Рэалізацыю беларуска-ўзбекскіх праектаў абмеркавалі ў Савеце Рэспублікі
28 жніўня, Мінск . У Савеце Рэспублікі Нацыянальнага сходу Беларусі абмеркавалі пытанні рэалізацыі беларуска-ўзбекскіх праектаў,
У Савеце Рэспублікі прайшла сустрэча з Надзвычайным і Паўнамоцным Паслом Узбекістана ў Беларусі Нурыдзінам Мамажонавым. Старшыня Савета Рэспублікі Наталля Качанава адзначыла, што Беларусь і Узбекістан звязваюць добрыя дружалюбныя адносіны. «Мы актыўна супрацоўнічаем на міжнародных пляцоўках, падтрымліваем адзін аднаго, што вельмі важна ў сучасных умовах», — падкрэсліла Наталля Качанава.
Спікер указала на тое, што супрацоўніцтва паміж Беларуссю і Узбекістанам развіваецца ў сферах эканомікі, адукацыі, аховы здароўя, маладзёжнай і гістарычнай палітыкі і ў многіх іншых галінах. Старшыня Савета Рэспублікі таксама нагадала аб тым, што ў час візіту Прэзідэнта Узбекістана Шаўката Мірзіёева ў Беларусь 8-9 ліпеня была падпісана дэкларацыя аб устанаўленні стратэгічнага партнёрства паміж краінамі. Акрамя таго, дзяржавы маюць намер павялічыць тавараабарот да $2 млрд да 2030 года. «Мы павінны зрабіць усё, каб дасягнуць гэтай мэты і рэалізаваць іншыя дамоўленасці», — падкрэсліла Наталля Качанава.
Нурыдзін Мамажонаў адзначыў тое, што адносіны паміж Беларуссю і Узбекістанам знаходзяцца на самым высокім узроўні. «У нас на сёння ёсць вельмі шмат перспектыўных напрамкаў для супрацоўніцтва. Перш за ўсё — гандаль. Я ўпэўнены ў тым, што мы не будзем чакаць 2030 года, каб дасягнуць намечанага ўзроўню тавараабароту. Ужо максімум праз паўтара года мы выканаем гэту задачу. Таксама актыўна сёння развіваецца міжрэгіянальнае супрацоўніцтва. Вызначаны графікі прыбыцця з візітамі кіраўнікоў рэгіёнаў дзвюх краін. Да канца кастрычніка практычна ўжо ўсе рэгіёны Узбекістана павінны наведаць Беларусь і прапрацаваць новыя праекты для развіцця прамысловай кааперацыі», — расказаў пасол.
На сустрэчы бакі дэталёва абмеркавалі магчымасці далейшага пашырэння беларуска-ўзбекскіх адносін. «Мы закранулі практычна ўсе сферы супрацоўніцтва. Так, мы абмеркавалі правядзенне беларуска-ўзбекскага міжпарламенцкага форуму ў горадзе Хіве, які адбудзецца 29-30 верасня бягучага года. Таксама размова ішла аб праектах у рэгіёнах, напрыклад у Віцебскай і Гомельскай абласцях, у якіх удзельнічаюць прадпрыемствы дзвюх краін. Упэўнены, што гэта наша сустрэча дасць новы імпульс развіццю беларуска-ўзбекскіх адносін», — рэзюмаваў дыпламат. 
Фота Віталя Піваварчыка
