Вяртанне лета ў верасні? Белгідрамет прагназуе пацяпленне да +28°С на наступным тыдні
3 верасня, Мінск . Белгідрамет прагназуе пацяпленне да плюс 28 градусаў на наступным тыдні. Аб гэтым расказалі БЕЛТА ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.
«Восень уступае ў свае паўнацэнныя правы нават нягледзячы на тое, што кліматычныя паказчыкі пакуль яшчэ перавышаюць значэнні, характэрныя для гэтага сезона года (сярэднясутачная тэмпература паветра павінна быць ніжэйшай за 15 градусаў). Так, 1 верасня адзначылася актыўнымі атмасфернымі працэсамі, калі раніца большасці школьнікаў пачалася з дажджоў, затым змянілася сонечным надвор’ем днём, а вечарам неба азарылі яркія ўспышкі маланак і грукат грому ў суправаджэнні ліўняў, парывістага ветру. У выніку гэтага міжсезоннага проціборства лета прайграла бітву і восень імклівымі тэмпамі прадаўжае набіраць абароты. Пры падтрымцы атлантычных цыклонаў верасень у Беларусі ў бліжэйшы час істотна папоўніць скарбонку нябеснай вільгаці, а таксама прынясе скандынаўскую прахалоду на крылах паўночнага ветру.
На наступным рабочым тыдні грэбень высокага ціску выправіць сітуацыю: зменшыць колькасць аблокаў і ападкаў, супакоіць вецер і запусціць паветра паўднёвых шырот. Таму на змену ветранаму і сырому надвор’ю прыйдуць сонечныя асеннія дні. Такім чынам, да канца бягучага тыдня тэрыторыя Беларусі прадоўжыць знаходзіцца ў цыкланічнай цыркуляцыі, таму ў рэспубліцы захаваецца няўстойлівы характар умоў надвор’я. Франтальныя раздзелы, якія перамяшчаюцца з захаду, паўночнага захаду Еўропы, абумовяць дажджы рознай інтэнсіўнасці ў большасці раёнаў краіны.
У начны і ранішні час 5 верасня (субота) месцамі дажджы будуць дасягаць моцных крытэрыяў. Пры актыўным развіцці канвектыўных працэсаў у асобных раёнах краіны прагрымяць навальніцы, а 5-6 верасня (субота-нядзеля) пры перападах атмасфернага ціску прагназуецца ўзмацненне ветру з парывамі 15-20 м/с. Пры гэтым з-за адвекцыі паветранай масы ўмераных шырот, тэмпературны фон 4-5 верасня (пятніца-субота) у асноўным будзе знаходзіцца на 1-3 градусы вышэй за сярэднія шматгадовыя значэнні (кліматычная норма першай дэкады верасня 13,4-15,8 градуса), а 6 верасня (нядзеля) у выніку паступлення больш халаднаватага паветра ўсталюецца адмоўная тэмпературная анамалія, якая складае 1-3 градусы. Начныя мінімумы будуць вагацца ад плюс 7 да плюс 17 градусаў, а дзённыя максімумы будуць знаходзіцца ў межах ад плюс 14 градусаў па поўначы да плюс 24 градусаў па паўднёвым усходзе», — расказалі ў Белгідрамеце.
У пятніцу, 4 верасня, ноччу па заходняй частцы, днём на большай частцы тэрыторыі краіны пройдуць кароткачасовыя дажджы. Днём месцамі прагрымяць навальніцы. У начны і ранішні час у асобных раёнах магчымы туман. Тэмпература паветра ноччу складзе 7-13 градусаў цяпла, па захадзе — плюс 14-16. Днём складзе ад плюс 16 градусаў па паўночным захадзе да плюс 24 градусаў па паўднёвым усходзе.
У суботу, 5 верасня, часам пройдуць дажджы, ноччу і раніцай месцамі чакаюцца моцныя дажджы. У асобных раёнах прагрымяць навальніцы. У многіх раёнах прагназуецца ўзмацненне ветру з парывамі 15-20 м/с. Тэмпература паветра ноччу складзе 11-17 градусаў цяпла, днём — ад плюс 14 градусаў па поўначы да плюс 23 градусаў па поўдні.
У нядзелю, 6 верасня, на большай частцы тэрыторыі краіны пройдуць кароткачасовыя дажджы. Днём у асобных раёнах прагрымяць навальніцы. Ноччу месцамі, днём у многіх раёнах прагназуецца ўзмацненне ветру з парывамі 15-20 м/с. Тэмпература паветра ноччу складзе 7-13 градусаў вышэй за нуль, днём — плюс 14-20 градусаў.
«На наступным рабочым тыдні (7-9 верасня) з ростам атмасфернага ціску колькасць і інтэнсіўнасць ападкаў зменшыцца, яны прымуць пераважна лакальны характар. Разам з тым паўночна-заходнія патокі зменяцца на паўднёва-заходнія, тэмпературны фон будзе паступова павышацца, і калі 7 верасня (панядзелак) на сярэдзіну дня яшчэ складзе 15-22 градусы вышэй за нуль, то ўжо 9 верасня (серада) паветра прагрэецца да плюс 19-26, а ў паўднёвых раёнах — да плюс 28. У начны і ранішні час у вільготным паветры месцамі будуць згушчацца туманы», — падзяліліся прагнозам сіноптыкі.
У панядзелак, 7 верасня, будзе пераважна без ападкаў, толькі ноччу месцамі па паўночным усходзе краіны пройдуць кароткачасовыя дажджы. Ноччу і раніцай у асобных раёнах па паўднёвым захадзе магчымы слабы туман. Тэмпература паветра ноччу складзе 5-12 градусаў цяпла, днём — плюс 15-22 градусы. 
У аўторак, 8 верасня, будзе пераважна без ападкаў. Ноччу і раніцай месцамі магчымы слабы туман. Тэмпература паветра ноччу складзе 2-9 градусаў вышэй за нуль, па захадзе месцамі — да плюс 11 градусаў. Днём будзе 19-26 градусаў цяпла.
У сераду, 9 верасня, будзе пераважна без ападкаў, толькі ноччу ў асобных раёнах па захадзе, днём па заходняй палове краіны пройдуць кароткачасовыя дажджы. Месцамі прагрымяць навальніцы. Ноччу і раніцай у асобных раёнах магчымы слабы туман. Тэмпература паветра ноччу складзе ад плюс 7 градусаў па ўсходзе да плюс 16 градусаў па захадзе. Днём будзе 19-26 градусаў цяпла, у паўднёвых раёнах — да плюс 28 градусаў.
Больш актуальнай і цікавай інфармацыі аб надвор’і глядзіце ў праграме АНТ «Метэагід» на videobel.by.
