«Мода і танец». Зорка сусветнага балета пра вобраз Како Шанэль на сцэне Вялікага тэатра Беларусі
Святлана Захарава 22 мая, Мінск . Народная артыстка Расіі, прыма-балерына Вялікага тэатра Расіі Святлана Захарава ў Мінску расказала аб рабоце над вобразам Како Шанэль для праекта MODANSE, які прадставяць 23 мая на сцэне Вялікага тэатра Беларусі,
У праграме MODANSE будуць прадстаўлены два аднаактовых балета — «Як дыханне» і «Gabrielle Chanel». Апошні прысвечаны легендарнай французскай заканадаўцы мод, якая ўвайшла ў гісторыю пад імем Како Шанэль, і створаны сумесна з домам CHANEL (дызайн касцюмаў) эксклюзіўна для пастаноўкі MuzArts. «Мы хацелі расказаць не пра тое, якую імперыю пабудавала Како Шанэль, а пра тое, якая яна была — з яе ўзлётамі і падзеннямі. Гэта была вельмі моцная, але пры гэтым ранімая жанчына», — расказала Святлана Захарава.
Паводле слоў прымы-балерыны, падрыхтоўка да пастаноўкі запатрабавала глыбокага вывучэння біяграфіі легендарнага мадэльера. Яна працавала ў кватэры Како Шанэль у Парыжы, вывучала фатаграфіі, успаміны і матэрыялы, звязаныя з жыццём куцюр’е. «Калі я ўпершыню прымерала гэты вобраз, гэта сапраўды было адчуванне пераўвасаблення», — адзначыла артыстка.
Генеральны дырэктар Вялікага тэатра Беларусі Кацярына Дулава таксама звярнула ўвагу на знешняе падабенства Святланы Захаравай з Како Шанэль.
Зорка сусветнага балета падкрэсліла, што для каманды было прынцыпова важна прадставіць праект менавіта на сцэне Вялікага тэатра Беларусі. «Я цудоўна ведаю гэту сцэну, цудоўна ведаю гэты тэатр. Гэты праект павінен паказвацца на сцэне сапраўднага тэатра», — заявіла яна.
Артыстка таксама прызналася, што нават знаёмая сцэна патрабуе падрыхтоўкі перад кожным спектаклем. «Мне трэба выйсці на рэпетыцыю, патаптацца, пабегаць, пакруціцца, каб знайсці сябе на гэтай сцэне. Тады ў час спектакля ўжо нічога не адцягвае ўвагі», — сказала Святлана Захарава.
Яна дадала, што з цеплынёй адносіцца да беларускай публікі і мінскай сцэны, на якой выступае не ўпершыню. «Я вельмі рада зноў быць тут і ўпэўнена, што беларускі глядач атрымае задавальненне ад спектакля», — адзначыла балерына.
