VIDEOBEL.BY — гэта наш вялікі агульны беларускі прарыў — тэлевядучыя
18 верасня, Мінск . Творчая сустрэча з журналістамі і тэлевядучымі Таццянай Рудакоўскай і Вікторыяй Сянкевіч адбылася ў Мінску ў час святкавання двухгоддзя мультымедыйнага партала VIDEOBEL.BY. Мерапрыемства прайшло ў Музеі наіўнага мастацтва і аб’яднала прадстаўнікоў медыясупольнасці і гасцей, якія цікавяцца развіццём айчыннай журналістыкі,
Сустрэча стала магчымасцю для адкрытай размовы аб творчым шляху, рабоце ў прамым эфіры і ўзаемадзеянні розных пакаленняў журналістаў. Вядучая «Нашай раніцы» Таццяна Рудакоўская расказала пра сваё прафесійнае станаўленне і шматгадовую працу на радыё і тэлебачанні. Сёння яна кіруе дырэкцыяй ранішняга вяшчання на тэлеканале АНТ, удзельнічае ў стварэнні кулінарнага шоу і сацыяльнага ток-шоу «Яшчэ не вечар».
Намеснік галоўнага дырэктара Галоўнай дырэкцыі тэлеканала «Першы інфармацыйны», вядучая «Галоўнага эфіру» Вікторыя Сянкевіч падзялілася вопытам работы над новымі тэлевізійнымі праектамі. У прыватнасці, пазнаёміла з дакументальным цыклам, прысвечаным паездцы па ЗША (здымачная група наведала 16 штатаў і пераадолела каля 5,5 тыс. км). У аснову фільмаў пакладзены гісторыі і месцы, якія ўяўляюць цікавасць для беларускай аўдыторыі.
Яшчэ адной тэмай сустрэчы стала ўзаемадзеянне вопытных журналістаў з маладымі калегамі. Удзельніцы абмеркавалі, як мяняецца прафесія пад уплывам сучасных тэхналогій, і падкрэслілі важнасць прафесійнай этыкі, пісьменнай мовы, адказнасці і гатоўнасці вучыцца. «Мы можам перадаць маладым журналістам мудрасць і вопыт, а яны вучаць нас дзёрзкасці», — адзначыла Таццяна Рудакоўская.
Не абышлі ўвагай і хваляванне, якое суправаджае журналістаў у час прамых эфіраў і вялікіх мерапрыемстваў. Паводле слоў тэлевядучых, важна навучыцца ўспрымаць яго як натуральную частку прафесіі і атрымліваць задавальненне ад узаемадзеяння з гледачом. Удзельніцы сустрэчы падзяліліся гісторыямі з практыкі, успомнілі першыя выступленні на сцэне і расказалі аб тым, як спраўляліся з нечаканымі сітуацыямі ў час работы.
Таццяна Рудакоўская таксама павіншавала мультымедыйны партал VIDEOBEL.BY з двухгоддзем і адзначыла яго запатрабаванасць у прафесійным асяроддзі. «Я наогул вельмі рада, што існуе такі рэсурс, як VIDEOBEL.BY, і віншую ад усёй душы з двухгоддзем. Маленькая дата, але вельмі важная», — дадала яна.
Паводле слоў журналіста, дзякуючы парталу можна аператыўна атрымліваць асноўную інфармацыю аб падзеях у краіне і свеце, не звяртаючыся да вялікай колькасці крыніц. «У мяне кожная раніца пачынаецца з маніторынгу інфармацыйных стужак. І так добра, што цяпер табе не трэба адкрываць вялікую колькасць рэсурсаў. Ты адкрываеш адзін і літаральна на працягу гадзіны даведаешся пра самае асноўнае, галоўнае», — канстатавала Таццяна Рудакоўская.
Яна таксама падкрэсліла важнасць непасрэднага ўзаемадзеяння з гледачамі, што дазваляе лепш разумець іх інтарэсы і запыты. «Калі ты фарміруеш нейкі парадак дня, павінен ведаць запыты гледача. І вось такое ўзаемадзеянне дазваляюць табе іх пачуць, убачыць», — упэўнена тэлевядучая.
Вікторыя Сянкевіч у сваю чаргу адзначыла, што «Першы інфармацыйны» і VIDEOBEL.BY з’яўляюцца равеснікамі. «Вельмі рада адзначаць гэту дату разам. Ну і, вядома ж, трэба развіваць сваё — і сваё вяшчанне ў эфіры, і сваё вяшчанне на іншых пляцоўках. VIDEOBEL.BY — гэта наш вялікі агульны беларускі прарыў», — сказала яна. 
Партал аб’ядноўвае кантэнт розных тэлеканалаў і крыніц. «Гэта вельмі важна — паказваць людзям сваё прыгожае і, галоўнае, — гаварыць і паказваць праўду», — падкрэсліла журналіст.
Гаворачы аб самой сустрэчы, Вікторыя Сянкевіч адзначыла асаблівую каштоўнасць непасрэднага ўзаемадзеяння з аўдыторыяй. Паводле яе слоў, журналісты не так часта сустракаюцца з гледачамі твар у твар, паколькі большую частку часу працуюць перад камерай. «Вельмі рада бачыць усіх, хто прыйшоў, і ўсіх, хто нас глядзіць і ведае, задае нам пытанні», — сказала яна.
Адказваючы на пытанне аб тым, што дапамагае заставацца ў прафесіі больш за 20 гадоў, тэлевядучая назвала галоўным любоў да сваёй справы. «І вось такія людзі, якія глядзяць на цябе і вочы загараюцца, — гэта, напэўна, самае галоўнае», — падагульніла Вікторыя Сянкевіч.
Фота Таццяны Матусевіч
