VIDEOBEL.BY — два гады ў эфіры: блогеры, новыя фарматы і планы па выхадзе на замежную аўдыторыю
18 верасня, Мінск . Мультымедыйнаму парталу VIDEOBEL.BY споўнілася два гады. Святочнае мерапрыемства праходзіць у Музеі наіўнага мастацтва ў Мінску. З днём нараджэння партал прыйшлі павіншаваць прадстаўнікі Міністэрства інфармацыі, кіраўнікі СМІ, журналісты і блогеры,
За два гады партал вырас да больш як 700 тыс. наведвальнікаў у месяц. Сёння на платформе размешчана каля 19 тыс. відэаролікаў, уключаючы матэрыялы беларускіх тэлеканалаў, інфармацыйных агенцтваў і рэгіянальных СМІ. З пачатку 2026 года па верасень рэсурс наведалі 2,5 млн чалавек.
Новыя аўтары і інтэрактыўнасць
Адным з галоўных напрамкаў далейшага развіцця стане супрацоўніцтва з блогерамі і інфлюэнсерамі, таксама плануецца пашырыць кантэнт і прыцягнуць новую аўдыторыю.
Міністр інфармацыі Дзмітрый Жук адзначыў, што VIDEOBEL.BY ўжо забяспечвае анлайн-вяшчанне беларускіх тэлеканалаў, а цяпер перад праектам стаяць задачы па прыцягненні прадстаўнікоў лічбавай супольнасці. «Я ўжо адмовіўся ад пабочных платформ тэлевяшчання і нават трансляцыю маладзёжнага форуму «Моладзь. Беларусь. Будучыня» з удзелам кіраўніка дзяржавы глядзеў у прамой трансляцыі на VIDEOBEL.BY. Перад намі стаяць яшчэ больш сур’ёзныя задачы — уключэнне ў гэту платформу нашай грамадзянскай лічбавай супольнасці. Я маю на ўвазе блогераў, інфлюэнсераў», — сказаў ён.
Паводле слоў міністра, цяпер прапрацоўваюцца падыходы, якія дадуць магчымасць зрабіць платформу больш інтэрактыўнай і прывабнай для карыстальнікаў.
Аб гатоўнасці разгледзець супрацоўніцтва з VIDEOBEL.BY заявіў і запрошаны на мерапрыемства блогер Мікіта Айс. «Гэта аўдыторыя, гэта новая галіна, якую трэба прапрацоўваць. У мяне ёсць даволі карысны кантэнт для гэтага напрамку, таму, безумоўна, будзем спрабаваць, будзем старацца, развівацца», — адзначыў ён.
Мабільныя сэрвісы і замежная аўдыторыя
У ліку бліжэйшых планаў — пашырэнне кантэнту, развіццё мабільных дадаткаў і запуск субцітраў на англійскай і нямецкай мовах. Як расказаў генеральны дырэктар БЕЛТА Андрэй Мохар, у топ-5 замежных карыстальнікаў партала ўваходзяць гледачы з Германіі, ЗША і Польшчы. Субцітры павінны зрабіць беларускі кантэнт больш даступным для аўдыторыі за межамі краіны.
Нацыянальная пляцоўка для беларускага кантэнту
Дзмітрый Жук падкрэсліў, што важная перавага VIDEOBEL.BY — магчымасць развіваць уласную платформу для размяшчэння матэрыялаў і анлайн-вяшчання айчынных тэлеканалаў. «Гэта выключна наша беларуская платформа, выключна кантралюемая намі», — адзначыў ён.
Каменціруючы блакіроўкі YouTube-каналаў беларускіх СМІ, міністр паведаміў, што Міністэрства інфармацыі прапрацоўвае розныя пытанні і сцэнарыі. Пры гэтым рашэнні, паводле яго слоў, павінны прымацца ўзважана, зыходзячы з мэтазгоднасці і інтарэсаў беларускай дзяржавы і народа.
Святкаванне двухгоддзя праходзіць у Музеі наіўнага мастацтва. Госці могуць сустрэцца з вядучымі праектаў VIDEOBEL.BY, пабываць на экскурсіі па музеі і прыняць удзел у майстар-класе па стварэнні карты жаданняў. Выбар пляцоўкі арганізатары растлумачылі блізкасцю ідэй: музей і мультымедыйны партал па-свойму адкрываюць розныя погляды на сучаснасць і даюць магчымасць прадставіць самабытнае бачанне свету.
VIDEOBEL.BY быў запушчаны 12 верасня 2024 года. На партале прадстаўлены грамадска-палітычныя і тэматычныя матэрыялы беларускіх СМІ, рэгіянальны кантэнт і анлайн-трансляцыі тэлеканалаў. У далейшым праект мае намер пашыраць магчымасці для аўтараў і гледачоў. 
Фота Таццяны Матусевіч
