Батутыстка Пабудзей заваявала два сярэбраныя медалі чэмпіянату свету ў Кітаі
Фота з архіва НАК Беларусі 15 лістапада, Мінск . Беларусы выйгралі восем узнагарод на юніёрскім першынстве свету па скачках на батуце, акрабатычнай дарожцы і двайным міні-трампе ў кітайскім Нанкіне,
Сярод дзяўчат не старэйшых за 16 гадоў прызёрам у індывідуальных скачках на батуце стала наша Ксенія Пабудзей. Кваліфікацыю беларуска прайшла з трэцім рэзультатам сярод 68 удзельніц, у паўфінале паказала лепшы рэзультат, а ў фінале набрала 53,91 бала і заняла другое месца. Ад кітаянкі, якая перамагла, Ксенію аддзялілі 0,4 ачка.
Яшчэ адна беларуска Віталіна Цуран у асабістым заліку замкнула шасцёрку мацнейшых. У сінхронных скачках Пабудзей і Цуран заваявалі сярэбраныя медалі, мінімальна ўступіўшы дзяўчатам з Расіі. Таксама серабро нашай камандзе прынёс Уладзімір Храпачкін, які стаў другім у індывідуальных скачках сярод юнакоў да 14 гадоў.
З Нанкіна нашы юныя спартсмены павязуць два залатыя, тры сярэбраныя і тры бронзавыя медалі. Сем з васьмі ўзнагарод здабылі батутысты, яшчэ адну бронзу заваявала прадстаўніца скачкоў на акрабатычнай дарожцы Сафія Парукова (U14). Усяго на юніёрскім першынстве свету ў Кітаі выступілі каля тысячы атлетаў з 45 краін.
