Рэпетыцыйнае тэсціраванне. Як зарэгістравацца на першы модуль, расказалі ў РІКВ
Фота з архіва 9 кастрычніка, Мінск . У Беларусі стартавала рэгістрацыя на першы модуль адукацыйнай праграмы рэпетыцыйнага тэсціравання. Намеснік дырэктара па інфармацыйных тэхналогіях, аналітычнай і метадычнай рабоце Рэспубліканскага інстытута кантролю ведаў Алена Валасач расказала аб тым, як зарэгістравацца на РТ і дзе яно будзе праводзіцца.
«Для многіх гэта першы такі вопыт, але баяцца новай сістэмы не трэба, яна ў нечым падобна да старой, калі ў нас існавалі этапы. Цяпер працуюць модулі — гэта адзіны комплекс з трох адукацыйных частак. Зарэгістравацца для ўдзелу ў адукацыйнай праграме РТ можна на сайце РІКВ», — праінфармавала Алена Валасач.
Перш за ўсё ўдзельніку трэба зарэгістраваць асабісты кабінет, запоўніўшы анкету. У раздзеле «Электронная пошта» трэба пазначыць адрас, да якога ёсць пастаянны доступ, на яго будуць прыходзіць пропускі. Таксама з яго дапамогай можна аднавіць пароль. Акрамя таго, сістэма запатрабуе даныя дакумента, які засведчвае асобу. Неабходна выбраць тып дакумента (пашпарт грамадзяніна Беларусі, пасведчанне на права жыхарства, пасведчанне аб нараджэнні і г.д.) і ўважліва ўказаць ідэнтыфікацыйны нумар. На тэсціраванні арганізатары будуць звяраць дакумент з данымі ў пропуску. Прозвішча, імя і імя па бацьку трэба ўказваць дакладна так, як яны запісаны ў дакуменце. Што датычыцца навучальнай установы, то школу, гімназію або каледж трэба выбраць з выпадаючага спіса і пазначыць год заканчэння. Калі навучанне яшчэ прадаўжаецца, пазначаецца год, у якім плануецца атрымаць атэстат. Таксама пры рэгістрацыі трэба адзначыць патрэбнасць у выкарыстанні мабільнага ўстройства з праграмным забеспячэннем для кантролю стану здароўя (напрыклад, пры дыябеце). На заканчэнне сістэма папросіць пацвердзіць згоду з умовамі дагавора і на апрацоўку персанальных даных. Пры выяўленні памылкі даныя можна будзе змяніць пазней у асабістым кабінеце.
Калі акаўнт на сайце РІКВ ужо ёсць, удзельніку проста трэба аўтарызавацца зручным спосабам: па электроннай пошце, па ідэнтыфікацыйным нумары або па нумары тэлефона. У выпадку, калі страчаны пароль, аднавіць яго можна, прытрымліваючыся інструкцый пасля націскання на «Забылі пароль?».
Пасля паспяховай рэгістрацыі ў асабістым кабінеце можна будзе знайсці тры модулі. Націснуўшы на «Модуль 1», на экране з’явіцца поўны пералік прадметаў. Патрэбныя ўдзельнік будзе дабаўляць у карзіну.
Для аплаты трэба перайсці ў карзіну з данымі прадметамі. Сістэма прапануе два спосабы аплаты: праз сістэму АРІП (інтэрнэт-банкінг) або банкаўскай карткай анлайн. У першым выпадку трэба зайсці ў дадатак банка і прайсці па дрэве: сістэма «Разлік» (АРІП), адукацыя і развіццё, РІКВ, адукацыйная праграма. Далей трэба ўвесці асабовы рахунак для аплаты — ён з’явіцца ў кабінеце пасля фарміравання заяўкі, пераправерыць прозвішча, імя, імя па бацьку і зрабіць плацеж.
Пры аплаце банкаўскай карткай анлайн трэба націснуць «Перайсці да аплаты» — сайт перанакіруе на абароненую старонку плацежнай сістэмы Assist. Там неабходна ўвесці 16 лічбаў карткі, тэрмін дзеяння (ММ/ГГ), CVC2/CVV з абароту. Пасля праверкі сумы можна зрабіць плацеж.
Як толькі аплата прайшла, у асабістым кабінеце актывіруецца доступ да прадмета ў модулі. Зайшоўшы ўнутр, можна азнаёміцца з інфармацыяй і зарэгістравацца на тэсціраванне. Трэба выбраць зручны пункт правядзення тэсціравання, дату і час. Пасля гэтага запісу можна запісацца на паўторны сеанс па гэтым жа прадмеце, калі ва ўдзельніка ёсць жаданне прайсці тэсціраванне яшчэ раз.
«На гэтым рэгістрацыя на першы модуль РТ завершана. Тыя, хто не зможа па якой-небудзь прычыне з’явіцца вочна ў пункт правядзення ў канцы модуля (пасля 25 снежня) зможа прайсці тэсціраванне ў рэжыме анлайн дыстанцыйна праз асабісты кабінет. Мы, вядома, раім з’явіцца ў пункт, каб адчуць усю атмасферу экзамену: запоўніць бланк, паслухаць інструктаж арганізатараў, прайсці тэсціраванне», — адзначыла Алена Валасач.
У асабістым кабінеце ўдзельніка размешчаны пералік пунктаў правядзення РТ. Для тых, хто будзе здаваць рэпетыцыйнае тэсціраванне ў Мінску, будуць даступны 14 пляцовак гарадскіх бібліятэк. Камфортныя залы, разлічаныя на 20-30 чалавек, абсталяваны ўсім неабходным: дошкамі, экранамі і гадзіннікамі. Усё гэта дасць магчымасць максімальна імітаваць працэдуру правядзення ЦЭ і ЦТ. Суправаджаць тэсціраванне будуць супрацоўнікі РІКВ і валанцёры — студэнты БДУ.
Першы модуль запланаваны на кастрычнік — снежань, другі — на студзень — люты, трэці — на сакавік — красавік. Усе пункты рэпетыцыйнага тэсціравання прымуць першых удзельнікаў 15 кастрычніка.
