Якія фундаментальныя работы беларускіх вучоных апісваюць праўдзівую гісторыю Вялікай Айчыннай?
Навіны сюжэта «Праект «Краіна гаворыць»» Прававая база і навуковыя даследаванні. Як Беларусь процідзейнічае фальсіфікацыі гісторыі Узмацненне гарантый, павелічэнне надбавак. Мінпрацы пра задачы па падтрымцы ветэранаў 5 ліпеня, Мінск . Якія фундаментальныя работы беларускіх вучоных апісваюць праўдзівую гісторыю Вялікай Айчыннай вайны, расказаў навуковы супрацоўнік Цэнтра ваеннай гісторыі Беларусі Інстытута гісторыі Нацыянальнай акадэміі навук Павел Ждановіч у праекце БЕЛТА «Краіна гаворыць».
Расказваючы пра фундаментальныя акадэмічныя работы, якія структуруюць і апісваюць сапраўдную гісторыю Беларусі ў час Вялікай Айчыннай вайны, Павел Ждановіч адзначыў у першую чаргу пяцітомнік «Гісторыя беларускай дзяржаўнасці». «Гэта фундаментальнае выданне, чацвёрты том якога прысвечаны падзеям Вялікай Айчыннай вайны і пасляваеннага аднаўлення. Таксама гэта выданне «Уклад беларускага народа ў Перамогу ў Вялікай Айчыннай вайне», у якім выкладзена шмат актуальнага факталагічнага матэрыялу, прыдатнага для выкарыстання ў навуковых і навукова-асветных мерапрыемствах», — расказаў ён.
Цяпер Інстытут гісторыі працуе над шматтомным выданнем, прысвечаным гісторыі Беларусі ў рамках дзяржаўнай праграмы, і адзін з тамоў таксама будзе прысвечаны падзеям Вялікай Айчыннай вайны. «Супрацоўнікі ў тым ліку Цэнтра ваеннай гісторыі Беларусі ўваходзяць у міжведамасную камісію, актыўна ўзаемадзейнічаюць па пытаннях генацыду беларускага народа з Генеральнай пракуратурай, прымаючы ўдзел у ліцэнзаванні выданняў, што выходзяць па лініі Генеральнай пракуратуры. Адзначу, што яны рэкамендаваны для выкарыстання ў адукацыйным працэсе, у тым ліку ў сярэдняй школе, сярэдніх спецыяльных і вышэйшых навучальных установах. Яны актыўна прымяняюцца пры вывучэнні падзей Вялікай Айчыннай вайны ў рамках вучэбнай дысцыпліны «Вялікая Айчынная вайна савецкага народа ў кантэксце Другой сусветнай вайны», — адзначыў Павел Ждановіч.
Акрамя таго, важным у кантэксце вывучэння тых падзей гісторык назваў выданне, шосты том якога выйшаў толькі ў гэтым годзе, — «Народны летапіс Вялікай Айчыннай вайны: успомнім усіх!». «Там мы збіраем звесткі ад нашых грамадзян. Ёсць магчымасць падзяліцца лёсам сваіх сваякоў у гады вайны, прыслаць геаграфічныя даныя, фотаматэрыялы, ілюстрацыі і ўспаміны. Мы разумеем, што, на вялікі жаль, ветэранаў становіцца менш, хоць рознымі ведамствамі была праведзена вялікая работа па захаванні іх успамінаў. Яны фіксаваліся вусна, запісваліся на дыктафоны. Шэраг тэлевізійных кампаній рабілі відэазапісы, якія сёння вывучаюцца і выкарыстоўваюцца. Музейныя ўстановы збіралі першасны навуковы матэрыял у выглядзе ўспамінаў ветэранаў, і сёння яны актыўна ўкараняюцца ў навуковую работу. Але тут трэба падыходзіць вельмі ўважліва, аналізаваць і ставіць падзеі ў кантэкст, таму што ўспаміны маюць суб’ектыўны характар, і пры ўвядзенні іх у навуковы абарот з імі трэба дасведчана працаваць», — расказаў Павел Ждановіч.
Вядома ж, немалаважнымі з’яўляюцца і матэрыялы, якія захоўваюцца ў архівах, у тым ліку дзённікі непасрэдных удзельнікаў падзей.
*Праект створаны за кошт сродкаў мэтавага збору на вытворчасць нацыянальнага кантэнту
