Чатыры матчы футбольнага чэмпіянату свету завяршыліся ўнічыю
Фота з сацсетак 16 чэрвеня, Мінск . На футбольных арэнах ЗША завяршыўся чарговы гульнявы дзень чэмпіянату свету,
У групе Н дэбютанты сусветнага першынства футбалісты Каба-Вердэ ў Атланце змаглі ўстаяць перад націскам дзеючага чэмпіёна Еўропы зборнай Іспаніі, здабыўшы нічыю — 0:0. У Маямі футбалісты Уругвая і Саудаўскай Аравіі таксама не выявілі пераможцу — 1:1.
У Сіэтле з такім жа рэзультатам завяршыўся паядынак групы G паміж бельгійцамі і егіпцянамі. У пачатку гульні паўабаронца афрыканскай каманды Эмам Ашур эфектным ударам паразіў вароты Цібо Куртуа, а пасля перапынку абаронца егіпцян зрэзаў мяч у свае вароты. У Лос-Анджэлесе зборныя Новай Зеландыі і Ірана забілі чатыры мячы на дваіх — 2:2.
Вечарам 16 чэрвеня ў барацьбу ўступяць віцэ-чэмпіёны свету французы, якія ў першай гульні квартэта I сустрэнуцца з камандай Сенегала. Футбалісты Нарвегіі будуць сапернічаць з іракцамі.
Беларускія балельшчыкі могуць сачыць за гульнямі сусветнага першынства ў прамым эфіры тэлеканала «Спорт ТБ».
Рэзультаты матчаў першага тура ў іншых групах:
А — Мексіка — ПАР — 2:0, Рэспубліка Карэя — Чэхія — 2:1;
B — Канада — Боснія і Герцагавіна — 1:1, Катар — Швейцарыя — 1:1;
C — Шатландыя — Гаіці — 1:0, Бразілія — Марока — 1:1;
D — ЗША — Парагвай — 4:1, Аўстралія — Турцыя — 2:0;
E — Германія — Кюрасаа — 7:1, Кот-д’Івуар — Эквадор — 1:0.
F — Швецыя — Туніс — 5:1, Нідэрланды — Японія — 2:2.
Склады астатніх квартэтаў: J — Аргенціна, Аўстрыя, Алжыр, Іарданія; K — Партугалія, Калумбія, Узбекістан, ДР Конга; L — Англія, Харватыя, Панама, Гана.
Групавы этап завершыцца 28 чэрвеня, пасля чаго ў плэй-оф выйдуць па дзве лепшыя каманды з 12 квартэтаў, а таксама восем лепшых з тых зборных, якія зоймуць трэція месцы. Матчы 1/16 фіналу адбудуцца 28 чэрвеня — 4 ліпеня, сустрэчы 1/8 фіналу пройдуць 4-7 ліпеня, чвэрцьфіналы — 9-12 ліпеня, паўфінальныя гульні намечаны на 14 і 15 ліпеня, матч за бронзу пройдзе 18 ліпеня ў Маямі, а 19 ліпеня ў Нью-Ёрку адбудзецца вырашальны паядынак за чэмпіёнскі тытул.
Фінальны турнір цяперашняга сусветнага першынства ўпершыню ў гісторыі праходзіць на арэнах адразу трох краін — ЗША, Канады і Мексікі. Таксама ўпершыню ў фінальнай стадыі сусветнага чэмпіянату ўдзельнічаюць 48 каманд. Дэбютантамі фіналу ЧС з’яўляюцца зборныя Узбекістана, Кюрасаа, Каба-Вердэ і Іарданіі.
