Англічане перамаглі харватаў на старце сусветнага футбольнага чэмпіянату
Фота Associated Press 18 чэрвеня, Мінск . На чэмпіянаце свету па футболе завяршыліся паядынкі першага тура групавой стадыі,
У квартэце L футбалісты Англіі перамаглі ў Даласе каманду Харватыі з лікам 4:2. Каманды пачалі гульню на высокіх скарасцях і ў першым тайме ўжо забілі па два мячы. На 12-й мінуце лідар англічан Хары Кейн рэалізаваў пенальці, праз 20 мінут Марцін Батурына далёкім ударам зраўняў лік, хутка Кейн аформіў свой галявы дубль, а за пару секунд да перапынку Петар Муса зноў аднавіў раўнавагу — 2:2. У самым пачатку другой паловы сустрэчы англічане зноў выйшлі наперад пасля сольнага праходу Джуда Белінгема. Харваты спрабавалі адыграцца, стварылі некалькі небяспечных момантаў, але на 85-й мінуце прапусцілі хуткую контратаку і Маркус Рэшфард забіў чацвёрты мяч. У Таронта зборная Панамы ўступіла Гане — 0:1.
У стартавым паядынку групы К зборная Партугаліі ў Х’юстане не здолела перамагчы футбалістаў ДР Конга — нічыя 1:1. Дэбютант планетарнага форуму зборная Узбекістана ўступіла ў Мехіка калумбійцам — 1:3.
Беларускія балельшчыкі могуць сачыць за гульнямі сусветнага першынства ў прамым эфіры тэлеканала «Спорт ТБ».
Рэзультаты стартавых гульняў у астатніх групах:
А — Мексіка — ПАР — 2:0, Рэспубліка Карэя — Чэхія — 2:1;
В — Канада — Боснія і Герцагавіна — 1:1, Катар — Швейцарыя — 1:1;
С — Шатландыя — Гаіці — 1:0, Бразілія — Марока — 1:1;
D — ЗША — Парагвай — 4:1, Аўстралія — Турцыя — 2:0;
Е — Германія — Кюрасаа — 7:1, Кот-д’Івуар — Эквадор — 1:0;
F — Швецыя — Туніс — 5:1, Нідэрланды — Японія — 2:2;
G — Бельгія — Егіпет — 1:1, Новая Зеландыя — Іран — 2:2
Н — Іспанія — Каба-Вердэ — 0:0, Уругвай — Саудаўская Аравія — 1:1;
І — Францыя — Сенегал — 3:1, Нарвегія — Ірак — 4:1;
J — Аргенціна — Алжыр — 3:0, Аўстрыя — Іарданія — 3:1.
Пасля першага тура бамбардзірскую гонку ўзначаліў лідар аргенцінскай зборнай Ліянэль Месі, які забіў усе тры мячы ў вароты алжырцаў.
Групавы этап завершыцца 28 чэрвеня, пасля чаго ў плэй-оф выйдуць па дзве лепшыя каманды з 12 квартэтаў, а таксама восем лепшых зборных з тых, хто заняў трэція месцы. Матчы 1/16 фіналу адбудуцца 28 чэрвеня — 4 ліпеня, сустрэчы 1/8 фіналу пройдуць 4-7 ліпеня, чвэрцьфіналы — 9-12 ліпеня, паўфінальныя гульні намечаны на 14 і 15 ліпеня, матч за бронзу пройдзе 18 ліпеня ў Маямі, а 19 ліпеня ў Нью-Ёрку адбудзецца вырашальны паядынак за чэмпіёнскі тытул.
Фінальны турнір цяперашняга сусветнага першынства ўпершыню ў гісторыі праходзіць на арэнах адразу трох краін — ЗША, Канады і Мексікі. Таксама ўпершыню ў фінальнай стадыі сусветнага чэмпіянату ўдзельнічаюць 48 каманд. Дэбютантамі фіналу ЧС з’яўляюцца зборныя Узбекістана, Кюрасаа, Каба-Вердэ і Іарданіі.
