Беларусь прадставіла экспазіцыю на выстаўцы Agro Food Drink Tech Expo ў Грузіі
Фота Белінтэрэкспа 13 лістапада, Мінск . Экспазіцыя беларускіх вытворцаў прадстаўлена на міжнароднай выстаўцы сельскай гаспадаркі, харчовай прамысловасці, вытворчасці прадуктаў харчавання і тэхналогій Agro Food Drink Tech Expo. Аб гэтым паведамілі ў «Белінтэрэкспа» Беларускай гандлёва-прамысловай палаты.
Экспазіцыя прадстаўлена прадпрыемствамі канцэрна харчовай прамысловасці «Белдзяржхарчпрам», рэгіянальнымі вытворцамі і вядучымі кампаніямі мяса-малочнай галіны.
Прадпрыемствы «Камунарка», «Кандытарская фабрыка «Слодыч» і «Спартак» дэманструюць шырокую лінейку шакаладу, цукерак, пячэння, падарункавых набораў з кандытарскіх вырабаў. Таксама экспанаваны блок дэсертнай і лікёра-гарэлачнай прадукцыі кампаній «Мінск Крышталь» — кіруючая кампанія холдынга «Мінск Крышталь Груп» і Віцебскага лікёра-гарэлачнага завода «Прыдзвінне». Прэзентаваны асартыментны пералік вытворцы піваварнага соладу кампаніі «Белсолад».
Каўбасную і далікатэсную прадукцыю, мяса, паўфабрыкаты, мясныя і мясараслінныя кансервы прапануе Жлобінскі мясакамбінат. Сярод навінак — сыравэнджаныя каўбаскі з водарам клубніц і з курагой. Брэсцкі мясакамбінат прэзентуе асартыментны набор каўбасных вырабаў, вэнджаную прадукцыю і паўфабрыкаты. 
ДП «Мазырскія малочныя прадукты» прэзентуе сухія малочныя прадукты, сметанковае масла, стэрылізаванае і пастэрызаванае малако, кефір, смятану, тварог, дэсертную групу, ёгурты і ражанку, а Пастаўскі малочны завод — лінейку сыроў і сырнай прадукцыі, салодка-сметанковае масла, малако, тварог, пастэрызаваныя вяршкі і іншыя навінкі. 
Холдынг Exponenta Group пры ўдзеле ЗТАА «Горацкі харчовы камбінат» і Tbilisi Milk Factory LLC прадстаўляе абястлушчаныя высокабялковыя малочныя прадукты з утрыманнем сыроватачна пратэіну, амінакіслотамі, прабіётыкамі і вітамінамі. У складзе экспазіцыі таксама лінейка малочнай прадукцыі.
Свае прадукты прадстаўляе Мінскі холадакамбінат №2. Асартымент прадукцыі, якую выпускае прадпрыемства, налічвае больш за 70 найменняў: эскімо, марожанае ў вафельных стаканчыках, брыкетах і ражках, кантэйнеры па 1-2 кг. Асаблівую ўвагу прадпрыемства ўдзяляе лімітаваным сезонным навінкам. 
«З кожным годам беларускія вытворцы пашыраюць прапанаваны асартымент тавараў, арыентуючыся на попыт і патрабаванні рынку», — адзначылі ў «Белінтэрэкспа» БелГПП.
У цырымоніі адкрыцця беларускай экспазіцыі прынялі ўдзел намеснік міністра сельскай гаспадаркі і харчавання — дырэктар Дэпартамента ветэрынарнага і харчовага нагляду Іван Смільгінь, старшыня Беларускай гандлёва-прамысловай палаты Міхаіл Мятлікаў, а таксама пасол Беларусі ў Грузіі Мікалай Рагашчук. У час выстаўкі арганізаваны дзелавыя сустрэчы з кіраўнікамі гандлёвых сетак і прадстаўнікамі грузінскага бізнесу для знаёмства з беларускімі прадпрыемствамі і кампаніямі, прадстаўленымі на пляцоўцы мерапрыемства. У ходзе B2B-сесій праходзяць перагаворы па экспарце і пастаўках тавараў у магазіны беларускіх прадуктаў у Грузіі і рэгіёне. 
Экспазіцыйны форум Agro Food Drink Tech Expo ўваходзіць у тройку найбуйнейшых выставачных мерапрыемстваў у рэгіёне Каўказа ў сферы сельскай гаспадаркі і харчавання. Падзея аб’ядноўвае больш за 70 буйных галіновых прадстаўнікоў з Беларусі, Грузіі, Турцыі, Італіі, Германіі і Славакіі.
Фота Белінтэрэкспа
