У Беларусі штогод расце доля выкарыстання мясцовых відаў паліва
27 верасня, Мінск . У Беларусі штогод расце доля выкарыстання мясцовых відаў паліва. Аб гэтым паведаміў міністр жыллёва-камунальнай гаспадаркі Генадзь Трубіла ў эфіры тэлеканала «Беларусь 1», .
У некаторых рэгіёнах ужо стартаваў ацяпляльны сезон, цяпло там пакуль пачалі падаваць у сацыяльныя аб’екты. Падрыхтоўка да асенне-зімовага перыяду ў краіне пачалася яшчэ ў канцы красавіка — пачатку мая. Камунальныя службы выканалі комплекс работ, у тым ліку займаліся перакладкай цеплавых сетак, рамонтам і рэканструкцыяй кацельняў, заменай устарэлых катлоў на больш эфектыўныя, пераводам кацельняў з газу на шчэпкі. Зроблены запасы драўнянага паліва.
«У нас акцэнт на мясцовыя віды паліва. Доля мясцовых відаў паліва ў нашай краіне з кожным годам расце. Гэта наша танная сыравіна. Выканалі і шэраг мерапрыемстваў эканамічнага плана, каб сэканоміць сабекошт 1 Гкал. Насельніцтва плаціць 29,2 рубля за 1 Гкал, сярэдні сабекошт па краіне — больш за 180 рублёў.Астатняе даплачвае дзяржава. Таму наша мэта — знізіць затраты на вытворчасць 1 Гкал, тым самым зменшыць бюджэтную датацыю на такі значны прадукт, як цяпло», — падкрэсліў Генадзь Трубіла. Ён дадаў, што ў галіне пастаянна працуюць над зніжэннем цепластрат.
Міністр адзначыў, што кацельні на мясцовых відах паліва выгадныя. Такім чынам ідзе замяшчэнне імпартнага газу айчыннымі паліўна-энергетычнымі рэсурсамі. «У нас 3618 кацельняў. Па-мойму, 2,4 тыс. — на мясцовых відах паліва, — сказаў ён. — Яшчэ адным трэндам мінулага і бягучага сезона стала тое, што мы звярнулі ўвагу на дробныя кацельні. Там персанал знаходзіцца, неабходна ацяпляць дровамі, падтрымліваючы тэмпературу. Гэта не зусім эфектыўна з пункту гледжання эканомікі. Таму прынята рашэнне і ўнесена ў дзяржпраграму — перавод гэтых кацельняў на аўтаматычны рэжым і на паліўныя гранулы (пелеты). Тым самым мы вызваляем працоўныя рэсурсы, вырашаем пытанне сабекошту 1 Гкал. Ён змяншаецца практычна ў два разы ў параўнанні з дрывянымі кацельнямі». У Беларусі ў 2025 годзе перавялі на пелеты 36 кацельняў, у сёлета — 37.
