«Спорт — гэта мова дыпламатыі, дружбы і павагі». Кавальчук аб развіцці міжнароднага супрацоўніцтва
Фота Мінспорту 23 кастрычніка, Мінск . Спорт — гэта міжнародная мова дыпламатыі, дружбы і павагі. Аб гэтым міністр спорту Сяргей Кавальчук заявіў на пленарным пасяджэнні «Спорт: аб’ядноўваючы свет у эпоху перамен» на XIV Міжнародным спартыўным форуме «Расія — спартыўная дзяржава» ў Краснаярску, паведамілі БЕЛТА ў прэс-службе Мінспорту.
Міністр падкрэсліў важнасць развіцця супрацоўніцтва ў рамках БРІКС, ШАС і СНД, правядзення сумесных мультыспартыўных спаборніцтваў і прыцягнення да іх большай колькасці ўдзельнікаў. «Мова спорту па-сапраўднаму міжнародная. Гэта мова дыпламатыі, дружбы і ўзаемнай павагі, у аснове якой улік інтарэсаў адзін аднаго, — адзначыў Сяргей Кавальчук. — Мы стварылі цэлую сістэму турніраў, якая дапамагае нам выходзіць на арэну яшчэ больш моцнымі, матываванымі і здольнымі змагацца ва ўсіх відах спорту. Мы ўпэўнена рухаемся наперад, аб чым сведчаць выступленні нашых атлетаў пасля вяртання на міжнародныя старты».
У Краснаярску таксама адбылося сумеснае пасяджэнне калегій спартыўных ведамстваў Беларусі і Расіі, на якім асаблівая ўвага была ўдзелена сумеснаму праекту абедзвюх краін «Кубак мацнейшых спартсменаў». «За два гады ён ператварыўся ў сістэмаўтваральны элемент нашага спартыўнага календара. У гэтым годзе праведзена ўжо восем спаборніцтваў па розных відах спорту з удзелам дзесяці дзяржаў. Традыцыю Кубка мацнейшых важна не проста захаваць, а правільна адаптаваць пад змяненні: недзе перафармаціраваць пад дапушчаныя віды спорту, каб турніры заставаліся максімальна карыснымі», — дадаў міністр.
Сяргей Кавальчук на палях форуму сустрэўся з калегамі з іншых краін. У прыватнасці, на перагаворах з прадстаўнікамі Ганы, Кубы і Сейшэльскіх астравоў спартыўныя функцыянеры выказалі зацікаўленасць у абмене вопытам па падрыхтоўцы трэнерскіх кадраў і арганізацыі ўзаемных стажыровак.
