Сі Цзіньпін агучыў чатыры падыходы да развіцця і кіравання ШІ
Сі Цзіньпін. Фота з архіва РІА Навіны 17 ліпеня, Шанхай /БЕЛТА — СІНЬХУА/. Развіццё і выкарыстанне тэхналогій штучнага інтэлекту (ШІ) павінна садзейнічаць усеагульнаму працвітанню. Аб гэтым заявіў старшыня КНР Сі Цзіньпін на адкрыцці Сусветнай канферэнцыі па штучным інтэлекце ў Шанхаі.
Паводле яго слоў, свет ступіў у перыяд беспрэцэдэнтна актыўных інавацый у сферы тэхналогій ШІ, што адкрывае вялікія магчымасці і адначасова з гэтым стварае выклікі ў сферы кіравання. Сі Цзіньпін перакананы, што чалавецтва павінна адказаць на пытанні сучаснасці.
У сувязі з гэтым старшыня КНР агучыў чатыры падыходы да развіцця і кіравання штучным інтэлектам. Па-першае, чалавецтву трэба прытрымлівацца прынцыпу адкрытасці і ўсеагульнай выгады, стымулюючы развіццё за кошт інавацый. Другім пунктам ён назваў павышэнне інфармаванасці аб рызыках, а таксама забеспячэнне бяспекі і кіруемасці ШІ. Па-трэцяе, паводле яго слоў, неабходна заахвочваць інклюзіўнасць, садзейнічаючы ўзаемнаму навучанню розных цывілізацый. Акрамя таго, трэба пашыраць салідарнасць, удасканальваючы глабальнае кіраванне.
Сі Цзіньпін адзначыў, што дзякуючы сумесным намаганням усіх бакоў напярэдадні ў Шанхаі была створана Сусветная арганізацыя супрацоўніцтва ў сферы штучнага інтэлекту. Пагадненне аб яе заснаванні падпісалі 29 краін.
Згодна з дакументам, новая арганізацыя будзе кіравацца прынцыпамі Статута ААН. Яе дзейнасць нацэлена на развіццё міжнароднага супрацоўніцтва і глабальнага кіравання ў сферы ШІ, забеспячэнне здаровага і ўпарадкаванага развіцця тэхналогій на карысць усяго чалавецтва.-0-
