Банк развіцця і Мінфін Судана падпісалі крэдытнае пагадненне аб фінансаванні паставак беларускай прадукцыі
Фота Банка Развіцця 5 кастрычніка, Мінск . Крэдытнае пагадненне аб фінансаванні Банкам развіцця паставак беларускай прадукцыі ў Судан падпісана ў час візіту ў Мінск дэлегацыі гэтай краіны на чале з дзяржаўным міністрам фінансаў і эканамічнага планавання Махамедам Нур Абдул-Даімам, паведамілі ў прэс-службе банка.
«Візіт выразна пацвярджае ўзаемны высокі інтарэс да нарошчвання ўзаемавыгаднага эканамічнага супрацоўніцтва. Для практычнай рэалізацыі будучых праектаў ужо створана прававая аснова: у ходзе пятага пасяджэння сумеснай беларуска-суданскай камісіі па супрацоўніцтве падпісана генеральнае пагадненне паміж урадамі дзвюх краін аб прадастаўленні экспартных крэдытаў», — сказаў старшыня праўлення Банка развіцця Срягей Сталярчук.
Дакумент прадугледжвае магчымасць крэдытавання Банкам развіцця паставак беларускіх тавараў, работ і паслуг у Судан. Галоўным тэзісам дня Сяргей Сталярчук назваў канкрэтызацыю патэнцыяльных праектаў для іх увасаблення. Акрамя таго, ён падрабязна расказаў аб механізмах фінансавання беларускага экспарту на прыкладзе ўжо рэалізаваных кейсаў.
«Нягледзячы на тое, што Банк развіцця — даволі маладая фінансавая ўстанова ў краіне, пры яго падтрымцы рэалізавана каля 700 экспартных кантрактаў у 18 краін свету. Пры гэтым наменклатура пастаўляемай за межы Беларусі прадукцыі разнастайная: ад харчовай прамысловасці да высокатэхналагічных вырабаў. Гэта сведчыць аб тым, што вопыт работы Банка развіцця па рэалізацыі знешнегандлёвых здзелак дае магчымасць сёння эфектыўна павялічыць тавараабарот паміж краінамі», — адзначыў Сяргей Сталярчук.
Сённяшняе падпісанне — наступны крок у рэалізацыі раней заключанага генеральнага пагаднення. Крэдытнае пагадненне створыць фінансавую аснову для рэалізацыі сумесных ініцыятыў па пастаўках беларускай прадукцыі ў Судан. У дзвюх краін ужо ёсць шэраг патэнцыяльных праектаў па пастаўках збожжасховішчаў, трактароў і іншай сельскагаспадарчай тэхнікі. Бакі адзначылі, што падпісанне гэтага дакумента з’яўляецца не проста дэкларацыяй аб намерах, а стратэгічным крокам: Беларусь гатова прапанаваць афрыканскім партнёрам не разавыя здзелкі, а доўгатэрміновую мадэль прамыслова-аграрнай кааперацыі, падмацаваную рэальнымі фінансавымі інструментамі. І Судан мае намер гэтай мадэллю скарыстацца ў поўнай меры.
Суданскі бок пацвердзіў гатоўнасць да прадметнай работы. «Мы ўдзячны кіраўніцтву Беларусі за нацэленасць на супрацоўніцтва з нашай краінай. У Судане памятаюць візіт Прэзідэнта Аляксандра Лукашэнкі ў 2017 годзе, які надаў імпульс узаемадзеянню паміж нашымі дзяржавамі. Мы зацікаўлены ў рэалізацыі сумесных праектаў з Беларуссю як па пастаўках прадукцыі сельскай гаспадаркі, так і тэхнікі для работы ў аграпрамысловым сектары. Суданскім фермерам добра вядома тэхніка МТЗ і, у прыватнасці, брэнд BELARUS. Упэўнены, што шырокі мадэльны рад вашай машынабудаўнічай прадукцыі зможа павысіць эфектыўнасць нашай сельскай гаспадаркі», — сказаў Махамед Нур Абдул-Даім.
Кіраўнік Банка развіцця прапанаваў замежным партнёрам не абмяжоўвацца прапрацаванымі праектамі, а паглядзець больш шырока на магчымасці Беларусі. «Мы фінансуем вялікую колькасць інвестыцыйных праектаў па ўсёй краіне і добра ведаем сваіх кліентаў і прадукцыю, якую яны выпускаюць. Таму вы можаце сфарміраваць пул неабходных вам тавараў або паслуг, а Банк развіцця ў сваю чаргу выступіць пляцоўкай для камунікацыі з вытворцамі», — абазначыў Сяргей Сталярчук.
