Паром з пасажырамі перавярнуўся каля берагоў Паўночнага Кіпра
Скрыншот відэа Kibris Postasi 30 жніўня, Мінск /Кар. БЕЛТА/. Паром з пасажырамі на борце перавярнуўся каля берагоў Паўночнага Кіпра, паведамляе TRT Haber.
У раёне здарэння праводзіцца пошукава-выратавальная аперацыя. Даных аб магчымых загінулых не паступала.
Паводле даных мясцовых улад, інцыдэнт здарыўся ў раёне 12.00 па мясцовым часе. Судна катамараннага тыпу ішло з порта Гірнэ (Кірэнія) у горад Ташуджу (міжземнаморская правінцыя Мерсін).
У раён здарэння накіраваны катары берагавой аховы, грамадзянскія судны і катары мясцовых рыбакоў, якія знаходзяцца каля ўзбярэжжа Кіпра.
Як удакладняе выданне Kibris Postasi, інцыдэнт здарыўся прыкладна за 2-2,5 км ад узбярэжжа Гірнэ. Капітан заўважыў паступленне вады ў насавую частку судна і паспрабаваў развярнуць паром назад да берага, аднак у хуткім часе судна перакулілася. На борце знаходзілася каля 300 пасажыраў. Сярод іх былі рускамоўныя падарожнікі, іх грамадзянства цяпер устанаўліваецца.
Берагавая ахова і экіпажы размешчаных паблізу суднаў займаюцца пошукам людзей, да месца надзвычайнага здарэння накіраваны машыны хуткай дапамогі. Паводле папярэдніх даных, ёсць пацярпелыя, аднак іх дакладная колькасць і стан пакуль не раскрываюцца.-0-
