Рэалізаваць дамоўленасці лідараў. Пасол Кітая аб мэце візіту дэлегацыі УК НПКСК у Мінск
Чжан Вэньчуань. Фота з архіва 11 верасня, Мінск . Мэта візіту дэлегацыі Усекітайскага камітэта Народнага палітычнага кансультатыўнага савета Кітая (УК НПКСК) у Мінск заключаецца ў рэалізацыі важных дамоўленасцей паміж лідарамі дзвюх краін і вывучэнні развіцця супрацоўніцтва ў галіне эканомікі, гандлю і пашырэнні ініцыятывы «Адзін пояс, адзін шлях». Аб гэтым журналістам заявіў пасол КНР у Беларусі Чжан Вэньчуань,
«Мэта візіту заключаецца ў тым, каб рэалізаваць важныя дамоўленасці паміж нашымі лідарамі, вывучаць развіццё супрацоўніцтва Кітая і Беларусі ў галіне эканомікі, гандлю і сумеснага будаўніцтва ініцыятывы «Адзін пояс, адзін шлях», — заявіў пасол.
Кітайская дэлегацыя прыбыла на чале з членам Пастаяннага камітэта, старшынёй Камітэта па эканамічных пытаннях УК НПКСК Ван Гашэнам.
Чжан Вэньчуань адзначыў, што гэты савет ў Кітаі адыгрывае вельмі важную ролю як у палітычным, так і ў эканамічным жыцці. «У савет уваходзяць эксперты па ўсіх напрамках: эканамісты, фінансісты, дзеячы культуры і спорту», — дадаў ён.
Пасол паведаміў, што сёння раніцай адбылася сустрэча дэлегацыі са старшынёй Савета Рэспублікі Нацыянальнага сходу Беларусі Наталляй Качанавай. «Абмяркоўвалі шырокае кола пытанняў. Усе выказалі гатоўнасць да далейшага ўмацавання ўсебаковага стратэгічнага партнёрства паміж Кітаем і Беларуссю. Вялікая ўвага была звернута на эканамічнае супрацоўніцтва», — расказаў ён.
Паводле слоў дыпламата, дэлегацыя падрабязна расказала аб развіцці эканомікі Кітая за першыя восем месяцаў бягучага года і выслухала меркаванні Наталлі Качанавай аб развіцці Беларусі і супрацоўніцтве паміж краінамі. «Мы дамовіліся аб тым, што і ў далейшым будзем умацоўваць супрацоўніцтва ў сумесным будаўніцтве ініцыятывы «Адзін пояс, адзін шлях». А таксама будзем прыкладаць сумесныя намаганні для рэалізацыі дырэктывы паважанага Прэзідэнта «Аб практычным напаўненні ўсепагоднага і ўсебаковага стратэгічнага партнёрства Рэспублікі Беларусь з Кітайскай Народнай Рэспублікай», — падкрэсліў Чжан Вэньчуань.
Пасол таксама адзначыў, што бакі дамовіліся ўмацоўваць супрацоўніцтва паміж заканадаўчымі органамі дзвюх краін, абменьвацца вопытам і рэгулярна сустракацца.
Паводле слоў Чжан Вэньчуаня, праграма візіту насычаная. Сёння пасля абеду запланавана сустрэча з першым намеснікам прэм’ер-міністра Мікалаем Снапковым.
Заўтра дэлегацыя наведае BELGEE і індустрыяльны парк «Вялікі Камень».
«Дзякуючы гэтым візітам на розных узроўнях паміж рознымі органамі мы можам разам знайсці больш агульных інтарэсаў для супрацоўніцтва», — рэзюмаваў пасол.
