Прамы рэйс, марскі порт і харвестары. Губернатар Архангельскай вобласці пра буйныя праекты з Беларуссю
Аляксандр Цыбульскі 24 жніўня, Мінск . Губернатар Архангельскай вобласці Расіі Аляксандр Цыбульскі па выніках сустрэчы ў Прэзідэнта Беларусі Аляксандра Лукашэнкі расказаў журналістам пра буйныя перспектыўныя праекты, якія абмяркоўваюцца ў плане развіцця супрацоўніцтва з беларускім бокам,
Гэта праекты ў сферы прамысловай кааперацыі, транспарту і лагістыкі. «Мы абмеркавалі некалькі важных і з практычнага пункту гледжання рэалізуемых ініцыятыў і напрамкаў. І разам прыйшлі да высновы, што ў нас існуючыя ўзаемаадносіны, тавараабарот далёкія ад тых магчымасцей, якія ёсць. Наша задача яго (тавараабарот. — Заўвага ) істотна павялічыць», — сказаў губернатар.
Аляксандр Цыбульскі ў першую чаргу расказаў аб магчымасцях кааперацыі ў сумеснай вытворчасці лесанарыхтоўчай тэхнікі. У гэтым напрамку як у Беларусі, так і ў Архангельскай вобласці ёсць кампетэнцыі. «У канцы мінулага года ў Архангельскай вобласці запушчана вытворчасць харвестарных галовак — гэта складаная састаўная частка лесанарыхтоўчай машыны. Тут мы бачым добрыя перспектывы па ўзаемадзеянні з кампаніяй «АМКАДОР», — заявіў ён.
Паводле слоў губернатара, такое супрацоўніцтва дасць магчымасць адысці ад залежнасці ад імпартнай тэхнікі. Аляксандр Цыбульскі разлічвае, што да канца года ў гэтым пытанні ў бакоў ужо будуць канкрэтныя напрацоўкі па развіцці супрацоўніцтва.
На сустрэчы ў Прэзідэнта Беларусі абмеркаваны магчымасці выкарыстання лагістычных маршрутаў праз паўночныя парты і ў прыватнасці праз порт Архангельска. «Тут мы бачым вялікія магчымасці і перспектывы ў частцы выкарыстання існуючых магутнасцей. У нас ёсць магчымасць перавальваць да 5 млн т грузу і далей праз марскі шлях накіроўваць іх на Усход, — расказаў губернатар. — Мы пачынаем рэалізацыю буйнога праекта па будаўніцтве глыбакаводнага марскога порта Архангельска. Тут таксама з беларускім бокам можам узаемадзейнічаць і нават вызначыць асобныя ўчасткі, якія маглі б выкарыстоўвацца для перавалкі грузаў з Беларусі. Ёсць пытанне, звязанае з чыгуначнымі тарыфамі. Мы на сябе ўзялі тут ініцыятыву папрацаваць з РЧ, урадам».
Размова таксама ішла аб аднаўленні прамых авіяцыйных зносін паміж Архангельскам і Мінскам. Паводле слоў губернатара, Архангельскі авіяцыйны атрад становіцца першым эксплуатантам найноўшых рэгіянальных пасажырскіх самалётаў Іл-114-300. «Ужо ў канцы гэтага года паступіць першая машына. І мы хацелі б гэтымі самалётамі наладзіць прамыя зносіны паміж нашымі сталіцамі», — заявіў Аляксандр Цыбульскі.
Ён таксама адзначыў высокі ўзровень узаемадзеяння ў навукова-адукацыйнай сферы, добрыя магчымасці для кааперацыі ў гэтым напрамку. Ёсць таксама добрыя напрацоўкі і перспектывы супрацоўніцтва ў будаўнічай сферы і ЖКГ, у Архангельскай вобласці карыстаюцца попытам беларускія ліфты. Таксама запатрабаваны прадукты харчавання з Беларусі і шэраг іншых тавараў.
Аляксандр Цыбульскі адзначыў, што шмат разоў бываў у Мінску і вельмі любіць гэты горад. «Бяром прыклад з таго, як можна трымаць горад у такой чысціні і парадку. Можна прыязджаць і браць майстар-класы», — сказаў губернатар.
