Пілігрымы з усёй Беларусі прыбываюць на ўрачыстасці ў Будслаў
3 ліпеня, Будслаў . Пілігрымы з усёй Беларусі прыбываюць да санктуарыя Маці Божай Будслаўскай на штогадовую ўрачыстасць,
У Нацыянальны санктуарый у Будславе ўжо прыбылі пілігрымы з Ліды, Жодзіна, Полацка, Ракава, Нарачы, Мінска, Браслава, Росіцы, Вілейкі. Чакаюцца вернікі з іншых населеных пунктаў. 
Адна з пілігрымак — посная — прадаўжалася пяць дзён. Шлях вернікаў пачаўся ў Мінску, і ўвесь гэты час яны ішлі да Нацыянальнага санктуарыя, ужываючы выключна ваду.
У хуткім часе пілігрымы прымуць удзел у святой службе. Потым пройдзе Хрэсны шлях. Запланавана маладзёжная праграма. Завершыць сённяшні дзень працэсія з копіяй абраза Маці Божай Будслаўскай, пасля якой у поўнач пачнецца служба. 
На працягу ўсёй урачыстасці вернікі могуць пакланіцца цудатворнаму абразу Маці Божай Будслаўскай і памаліцца перад ім.
Цяперашні Будслаўскі фэст у Нацыянальным санктуарыі пачаўся на наступны дзень пасля традыцыйнага парафіяльнага свята. Такім чынам, святкаванні ў гонар Маці Божай Будслаўскай адбываюцца з 2 па 4 ліпеня.
У гэтым годзе адзначаецца 35-годдзе аднаўлення структур каталіцкага касцёла ў Беларусі. Таму галоўным дэвізам на ўрачыстасцях у Будславе былі выбраны словы: «Богу слава — Марыі давер — касцёлу вернасць», якія з’яўляюцца адлюстраваннем мэты святкавання: з годнасцю праславіць Бога, дзякуючы за дар адраджэння касцёла, аддаць пад апеку Маці Божай сябе і сваіх блізкіх і выказаць гатоўнасць верыць і быць у супольнасці касцёла да канца жыцця. 
У час урачыстасцей у Нацыянальным санктуарыі ў Будславе адбудзецца пасвячэнне Мінска-Магілёўскай мітраполіі, а гэта значыць Касцёла ў Беларусі, Найкаштоўнейшай Крыві Хрыста.
Будслаўскі фэст — штогадовая ўрачыстасць у гонар цудатворнага абраза Божай Маці Будслаўскай, які знаходзіцца ў касцёле Успення Прасвятой Дзевы Марыі. Абраз славіцца шматлікімі цудамі. Першае афіцыйнае масавае паломніцтва да цудатворнага абраза адбылося ў 1992 годзе.
Фота Таццяны Матусевіч
