Лукашэнка павіншаваў Лулу да Сілву з перавыбраннем на пасаду Прэзідэнта Бразіліі
Лула да Сілва. Фота з архіва AP Photo 26 кастрычніка, Мінск . Прэзідэнт Беларусі Аляксандр Лукашэнка павіншаваў Луіса Інасіу Лулу да Сілву з перавыбраннем на пасаду Прэзідэнта Федэратыўнай Рэспублікі Бразілія. Аб гэтым паведамілі ў прэс-службе беларускага лідара.
«Бразільскі народ прадэманстраваў давер да Вашага паслядоўнага курсу на пабудову магутнай і незалежнай сацыяльна арыентаванай дзяржавы, якая самастойна выбірае свой вектар развіцця, — гаворыцца ў віншаванні. — Перакананы, што пад Вашым кіраўніцтвам Бразілія прадоўжыць упэўнена ісці шляхам умацавання суверэнітэту і аўтарытэту на міжнароднай арэне».
«Можаце і ў далейшым разлічваць на Беларусь як на надзейнага і адказнага партнёра, нацэленага на пашырэнне трывалых двухбаковых адносін на прынцыпах узаемнай павагі і дружбы дзеля дабрабыту нашых народаў і забеспячэння справядлівага светапарадку», — адзначыў Прэзідэнт Беларусі.
Аляксандр Лукашэнка пажадаў Луісу Інасіу Лулу да Сілву моцнага здароўя і прафесійнага даўгалецця, а ўсім грамадзянам Бразіліі — міру, адзінства і дастатку.
