Фінскі фільм «Вінскі і тайна перавернутага горада» прызнаны лепшым на дзіцячым конкурсе «Лістападзік»
Кадр з фільма 4 лістапада, Мінск . Карціна «Вінскі і тайна перавернутага горада» фінскага рэжысёра Юха Вуаліёкі прызнана лепшай на конкурсе фільмаў для дзіцячай і юнацкай аўдыторыі «Лістападзік». Пераможцу аб’явілі на ўрачыстай цырымоніі закрыцця конкурсу, якая праходзіць у кінатэатры «Піянер» у Мінску,
Вінскі ўмее станавіцца нябачным з дапамогай чарадзейнага парашку. Але калі зелле аказваецца ў зладзеяў, герой губляе сваю сілу. Цяпер небяспека пагражае яго сям’і і роднаму гораду. Каб выратаваць усіх, Вінскі трэба разгадаць загадкі, пакінутыя зніклым аптэкарам, і адшукаць шлях у перавернутую частку горада.
Як адзначыў кінарэжысёр заслужаны дзеяч мастацтваў Расійскай Федэрацыі, член журы Дзмітрый Астрахан, самае важнае для дзіцячага кіно — каб фільм быў цікавым. «Для журы галоўнае — наколькі фільм заразлівы, яркі, наколькі прафесійна зроблена работа, як ён глядзіцца ў кантэксце нашага часу. І «Вінскі і тайна перавернутага горада» — гэта прафесійна цэласна зробленая работа, дзе ёсць і сцэнарый, і рэжысура, і ігра артыста — вельмі добра іграў галоўны герой. Гэта цэласнасць спрацавала. Усе члены журы (і дарослага, і дзіцячага) аднагалосна вылучылі гэту карціну. Мне было прыемна, што ў дзяцей добры густ — яны ўзялі і таксама выбралі гэты фільм», — сказаў ён.
Фільм-пераможца «Лістападзіка» атрымаў другую ўзнагароду — спецыяльны прыз дзіцячага журы «Кіно вачамі дзяцей».
Прыз глядацкіх сімпатый атрымала расійская карціна «Я стану капітанам». Заслужаную ўзнагароду ўручылі выканаўцу галоўнай ролі Аляксандру Воранаву. «Гэты фільм пра тое, як просты хлапчук з сібірскай вёскі адчайна спрабуе знайсці свайго бацьку-капітана. Мы здымалі яго ва Уладзівастоку, больш за ўсё запомнілася сцэна ў акіяне, гэта было незвычайна і цікава. Іграць ролю асабліва не даводзілася, таму што мы з галоўным героем практычна равсенікі, ён такі ж просты, мы з ім вельмі падобныя. Фільм расказвае дзецям пра тое, што цуд паўсюль і ў яго трэба верыць. Я сам таксама веру ў цуд», — прызнаўся юны акцёр.
Дыплом «За арыгінальны сцэнарый» атрымаў фільм «Алтын Адам» (Казахстан).
Беларускі дзіцячы анімацыйны фільм «Ваўчок» узнагароджаны дыпломам «За глыбокі выхаваўчы патэнцыял і прыхільнасць да традыцыйных каштоўнасцей». Узнагароду атрымалі рэжысёры Алена Турава і Ірына Тарасава. «Прыемна атрымліваць узнагароды на роднай зямлі. Беларуская анімацыя дастойна гэтага», — адзначылі яны.
У намінацыі «Лепшая работа дарослага акцёра ў фільме для дзяцей і юнацтва» прыз атрымаў фільм «Сакрэт Эфеса» (Турцыя). А за лепшую дзіцячую ролю ў фільме для дзяцей і юнацтва ўзнагароджана выканаўца галоўнай ролі ў фільме «Другі дзённік Паўліны П.» (Харватыя, Славенія, Сербія) Каця Маткавіч.
Спецыяльны прыз журы конкурсу «Лістападзік» атрымаў фільм «Навічкі» (Мексіка, Іспанія).
Рэжысёр дзіцячага кіно, член журы «Лістападзіка» Падмаваці Маладзі (Індыя) адзначыла: «Я глядзела ўсе фільмы, і ўсе яны цудоўныя. Галоўным крытэрыем для выбару лепшага фільма для мяне быў сюжэт, паколькі сама пішу сюжэты для фільмаў. Я другі раз на фестывалі «Лістапад», першы раз прыязджала ў якасці ўдзельніка. Тады мой фільм выйграў у намінацыі «За лепшы фільм». Мінскі кінафестываль адрозніваецца ад іншых тым, што тут усё напоўнена любоўю і ўсе адчуваюцца як другая сям’я», — падзялілася ўражаннямі яна.
