Творчасць трох пакаленняў: у Мінску адкрылася выстава да 100-годдзя з дня нараджэння мастака Аляксандра Семілетава
10 ліпеня, Мінск . У Нацыянальным мастацкім музеі адбылося ўрачыстае адкрыццё выставы «Аляксандр Семілетаў: Першы з дынастыі», прымеркаванай да 100-годдзя з дня нараджэння славутага беларускага жывапісца і педагога, 
У экспазіцыю ўвайшло каля 30 жывапісных работ майстра, створаных у перыяд 1960-1980-х гадоў. Творы прадстаўлены з фондаў Нацыянальнага мастацкага музея, калекцыі Беларускага саюза мастакоў, а таксама з асабістага збору сям’і аўтара. Жанравы дыяпазон экспазіцыі шырокі і ахоплівае пейзажы, партрэты і сюжэтна-тэматычныя карціны.
Як адзначыла малодшы навуковы супрацоўнік аддзела беларускага мастацтва XX-XXI стагоддзяў Настасся Мянькоўская, выставачны праект дае магчымасць прасачыць трансфармацыю мастацкага светапогляду аўтара на працягу яго творчага шляху. Аляксандр Семілетаў вучыўся ў такіх класікаў беларускага жывапісу, як Валянцін Волкаў і Віталь Цвірка. У яго ранняй творчасці прыкметна моцны ўплыў сацрэалізму і так званага суровага стылю з яго манументальнымі формамі і халодным каларытам. Пазней яго стыль стаў больш экспрэсіўным, што асабліва яскрава выявілася ў пейзажах другой палавіны 1980-х гадоў, навеяных прыродай жыткавіцкага Палесся», — расказала куратар выставы.
Паколькі праект задумваўся як дэманстрацыя творчай пераемнасці, на выставе таксама прадстаўлены творы сына мастака Барыса Семілетава і ўнука Івана. Мастак Іван Семілетаў падзяліўся цёплымі ўспамінамі пра дзядулю, ахарактарызаваўшы яго як вельмі добрага, адкрытага чалавека, які пастаянна працаваў на пленэрах і ўспрымаў эцюды як матэрыял для будучых вялікіх палотнаў.
Ён таксама расказаў аб працэсе падрыхтоўкі экспазіцыі. «Мая задача з бацькам заключалася ў тым, каб адрэстаўрыраваць рамы і падрыхтаваць работы. Аляксандр Фёдаравіч любіў пісаць тэмперай на ДВП. Гэта вельмі моцны матэрыял, таму практычна ўсе карціны з нашай калекцыі, за выключэннем двух-трох палотнаў, выдатна захаваліся», — адзначыў Іван Семілетаў.
З выставачным праектам можна будзе азнаёміцца ў пераходнай галерэі музея да 18 жніўня.
