Дваіх пацярпелых у Бранскай вобласці дзяцей выпісалі дадому, яшчэ трое застаюцца ў медустановах
29 чэрвеня, Мінск . Дваіх пацярпелых у Бранскай вобласці дзяцей выпісалі дадому, яшчэ трое маленькіх пацыентаў застаюцца ва ўстановах аховы здароўя Мінска,
Сёння выпісаны дадому двое пацыентаў РНПЦ дзіцячай хірургіі. «За імі прыехаў аўтамабіль з Гомельскай вобласці, з Рэчыцы. Яны выпісаны ў здавальняючым стане. Я думаю, усё ў іх будзе добра», — сказаў дырэктар цэнтра Канстанцін Драздоўскі.
Нягледзячы на тое, што дзецям давялося перажыць, пры выпісцы яны даволі бадзёрыя і вясёлыя. Паводле слоў дырэктара цэнтра, з імі займаліся дзіцячыя псіхолагі. «У час выпіскі стан аптымістычны», — звярнуў увагу ён.
Канстанцін Драздоўскі адзначыў, што дзеці прадоўжаць знаходзіцца пад наглядам у сувязі са сваімі траўмамі. У Гомельскай вобласці прадоўжыцца і псіхалагічная рэабілітацыя.
Адно дзіця пакуль застаецца ў РНПЦ дзіцячай хірургіі. «Перыядычна праводзяцца хірургічныя і тэрапеўтычныя мерапрыемствы, звязаныя з траўмай, якую яно атрымала. Дзіця знаходзіцца ў палаце ў здавальняючым стане. Але ёсць асаблівасці траўмы, якія выклікаюць неабходнасць перыядычна праводзіць хірургічныя маніпуляцыі», — дадаў дырэктар цэнтра.
Адказваючы на пытанне, колькі яшчэ часу пацыент будзе ў бальніцы, Канстанцін Драздоўскі адзначыў, што гэта будзе залежаць ад ходу пасляаперацыйнага перыяду.
Бацька выпісанага сёння хлопчыка Аляксандр падзякаваў адміністрацыі, медперсаналу і тэхперсаналу за выкананую імі работу. «Яны зрабілі ўсё, што было ў іх сілах. Нашы дзеці здаровыя і сёння едуць дадому. Усе праведзеныя аперацыі прайшлі паспяхова. Вялікі дзякуй», — сказаў ён.
Гаворачы аб падтрымцы, якую аказвалі ў сценах установы аховы здароўя, Аляксандр адзначыў: «Працавалі псіхолагі, прапаноўвалі інтэлектуальныя гульні, праводзілі духоўныя гутаркі. Псіхалагічны стан дзіцяці выдатны». Акрамя таго, бацька выпісанага хлопчыка падкрэсліў: «Органы не закрануты, кісць працуе, грудная клетка ў парадку. Урачы гавораць, што ў бліжэйшыя дні будуць зняты швы і ў далейшым у нас усё будзе добра».
Фота Мікалая Пятрова
