Цеплыня з Атлантыкі і дажджы. Якое надвор’е чакаць беларусам 16-22 лістапада, расказалі сіноптыкі
15 лістапада, Мінск . У Беларусі на наступным тыдні будзе пераважна ўмерана цёплае і вільготнае надвор’е, што прынясуць паветраныя масы з Атлантыкі. У якія дні лепш не выходзіць з дому без парасона, БЕЛТА расказалі ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя.
На працягу наступнага тыдня захаваецца адносна цёплае надвор’е, сярэднясутачная тэмпература будзе на 2-4 градусы вышэйшая за норму.
Заўтра, 16 лістапада, на надвор’е будзе ўплываць вобласць высокага атмасфернага ціску. Пераменная воблачнасць і малая верагоднасць ападкаў у большасці раёнаў — такі прагноз даюць сіноптыкі. Галалёд і на дарогах галалёдзіца, начныя замаразкі ад мінус 3 градусаў па Цэльсію. Днём будзе не горача — ад 0 да 5 градусаў са знакам плюс.
«У аўторак, 17 лістапада, умовы надвор’я стане вызначаць атмасферны фронт і вільготныя паветраныя масы. Уначы па захадзе, а днём у большасці раёнаў рэспублікі пройдуць дажджы. Вецер будзе заходні, паўднёва-заходні ўмераны. Вільготнасць паветра складзе да 70%. Раніцай месцамі чакаецца туман, слабы галалёд, на дарогах прагназуецца галалёдзіца», — адзначылі ў Белгідрамеце, дадаўшы, што тэмпература паветра будзе вагацца ад мінус 3 градусаў уначы да плюс 9 градусаў удзень.
У сераду, 18 лістапада, над Беларуссю пройдзе фронт, які нясе дажджы, а ноччу і раніцай магчымы мокры снег. Аўтамабілістам трэба быць больш асцярожнымі, на дарогах будзе слізка. Уначы і раніцай чакаецца ад 1 да 6 градусаў цяпла, днём слупок тэрмометра пакажа ад 5 да 10 градусаў вышэй за нуль.
У другой палавіне тыдня франтальныя раздзелы з Атлантыкі прынясуць у нашу краіну пахмурнае надвор’е. Ужо ў чацвер, 19 лістапада, у большасці раёнаў прагназуюцца дажджы. Вецер з умеранай скорасцю будзе дзьмуць з поўдня і паўднёва-заходняга напрамку. Захаваецца ранішні туман. Уначы тэмпература будзе вар’іравацца ад плюс 2 да 7 градусаў. Днём паветра прагрэецца, на ўсходзе чакаецца ад 7 градусаў са знакам плюс, а ў паўднёвых рэгіёнах — да плюс 11 градусаў.
Пятнічнае надвор’е застанецца дажджлівым, прагназуюцца кароткачасовыя дажджы, таму 20 лістапада лепш узяць з сабой парасон. Вецер будзе паўднёва-заходні, паўднёвы, умераны. Уначы і раніцай месцамі чакаецца туман, сіноптыкі папярэджваюць: бачнасць складзе да паўкіламетра. Начныя тэмпературы чакаюцца ад 3 да 7 градусаў цяпла, днём прагназуецца ад плюс 4 градусаў на поўначы да плюс 9 градусаў па паўднёвым усходзе.
Наступныя выхадныя на Беларусь прыйдзе вялікі атлантычны цыклон. «Захаваецца пахмурнае, сырое і ветранае, але не па сезону цёплае надвор’е», — падкрэслілі ў Белгідрамеце.
У суботу, 21 лістапада, часам пройдуць дажджы. Уначы і раніцай месцамі будзе назірацца туман, вецер стане парывістым, будзе дзьмуць з паўднёвага захаду. Ад мінус 2 да плюс 2 градусаў чакаецца ноччу, а ўдзень — ад плюс 3 да плюс 8 градусаў.
У нядзелю, 22 лістапада, будзе воблачна з праясненнямі. У большасці раёнаў прагназуюцца дажджы. У начны і ранішні час магчымы туман. Скорасць ветру будзе ўмеранай, часам узмоцніцца да парывістай, дзьмуць ён будзе з заходняга і паўднёва-заходняга напрамкаў. Начная тэмпература паветра будзе вар’іравацца ад 0 да плюс 5 градусаў, днём — ад 2 да 7 градусаў вышэй за нуль.
Больш актуальнай і цікавай інфармацыі пра надвор’е глядзіце ў праграме АНТ «Метэагід» на VIDEOBEL.BY.
