«Ад пісьменніц да дзюдаістак». БЕЛТА прадставіла ўнікальную праграму пра жанчын у Дзень беларускага пісьменства
Якая яна — беларуская жанчына? Менавіта на гэта пытанне адказвае ўнікальная праграма, прысвечаная Году беларускай жанчыны, якую ў Дзень пісьменства прадставілі ў павільёне БЕЛТА. Тут госці змаглі пазнаёміцца з выдатнымі беларускамі з розных сфер і іх дасягненнямі, паўдзельнічаць у майстар-класах і стварэнні партрэта сапраўднай беларускі.
Першы намеснік генеральнага дырэктара БЕЛТА Васіль Мацвееў расказаў, што серыя сустрэч з беларускамі дапаможа паказаць, якія яны творчыя, моцныя і таленавітыя. У праграме — сустрэчы, майстар-класы, аўтограф-сесіі, якія дораць магчымасць даведацца больш аб іх жыцці.
Пачаўся дзень з сустрэчы з паэтэсай, драматургам, кіраўніком Магілёўскага абласнога аддзялення Саюза пісьменнікаў Беларусі Вольгай Бяловай. Яна сабрала шмат людзей, расказала пра свой творчы шлях, правяла аўтограф-сесію і падарыла чытачам свае кнігі. Такія сустрэчы — выдатны спосаб пазнаёміцца з чытачом і стаць да яго бліжэй.
Пасля госці свята змаглі ўбачыць паказальныя выступленні самых моцных, трывалых і валявых дзяўчат Касцюковіч — дзюдаістак мясцовай дзіцяча-юнацкай спартыўнай школы, дзе выхоўваюцца будучыя чэмпіёнкі. Тут пачынала свой шлях чэмпіёнка свету па самба, неаднаразовая пераможца першынстваў свету і Еўропы Анфіса Капаева. На жаль, сама яна не змагла прысутнічаць на сустрэчы, бо толькі ўчора ўдзельнічала ў чэмпіянаце Беларусі па самба, дзе выйграла ганаровае золата. Аднак яе першы настаўнік, старшы трэнер-выкладчык аддзялення дзюдо Касцюковіцкай ДЮСШ Аляксандр Герашчанка разам са сваімі выхаванцамі — надзеяй беларускага спорту — правёў майстар-клас, дзе гасцей азнаёмілі з ударнай і кідковай тэхнікай самба.
На працягу ўсяго дня жыхары Касцюковіч прымалі ўдзел у мастацкім флэш-мобе па маляванні партрэта беларускі. Саму карціну стварыла магістр мастацтвазнаўства Інстытута НАН Беларусі, дызайнер адзення і мастачка Лаліта Шыш, але кожны змог дадаць сваю дэталь і паказаць, як ён бачыць беларускую жанчыну. Карціна застанецца на памяць у Касцюковіцкім музеі. Адбылася і сустрэча з заслужанай артысткай Беларусі Ірынай Дарафеевай, якая адказала на хвалюючыя слухачоў пытанні.
Сёння таксама прайшла прэзентацыя знакавай кнігі «Дажынкі. 30 гадоў». Яе выдавецтва БЕЛТА выпусціла да юбілею галоўнага свята аграрыяў. Генеральны дырэктар БЕЛТА Андрэй Мохар падкрэсліў, што гэта кніга — летапіс трыццацігадовага шляху адраджэння беларускай вёскі, гісторыя вернасці роднай зямлі і трыумфу дзяржаўнай палітыкі, якая паставіла ў аснову харчовы суверэнітэт краіны.
Прэзентацыю наведалі ганаровыя госці, сярод якіх былі намеснік прэм’ер-міністра Наталля Пяткевіч, памочнік Прэзідэнта Рэспублікі Беларусь па Магілёўскай вобласці Надзея Каткавец, старшыня Касцюковіцкага райвыканкама Наталля Асмалоўская. Яны не толькі атрымалі ў падарунак новыя выданні і караваі са свежага хлеба, але і змаглі ўнесці апошнія штрыхі ў партрэт прыгажуні-беларускі.
На выстаўцы прадстаўлены і іншыя выданні БЕЛТА. Сярод іх часопісы «Беларуская думка» і «Эканоміка Беларусі», газета «7 дзён», кніга «Голоса мира. Со знаком качества», якая атрымала ўзнагароду Міжнароднага конкурсу «Мастацтва кнігі» дзяржаў СНД, кніга да 60-годдзя Палаца спорту, праект «Апошнія сведкі».
У планах — сустрэча і аўтограф-сесія з народным артыстам Беларусі кампазітарам Эдуардам Ханком, які не толькі паразмаўляе з паклоннікамі, але і спяе некалькі папулярных хітоў. Акрамя таго, адбудзецца выступленне віртуознай цымбалісткі, лаўрэата міжнародных конкурсаў Кацярыны Каванавай. Яна сыграе творы абсалютна розных жанраў: ад класікі і народных мелодый да рока і рок-н-рола.
Паводле слоў Васіля Мацвеева, сёння ў цэнтры ўвагі — беларускі, якімі мы ганарымся і якіх хочам паказаць з розных бакоў, бо яны вельмі шматгранныя і яркія, рэалізуюць сябе і ў спорце, і ў палітыцы, і ў грамадскай дзейнасці, і ў мастацтве.
Фота Алега Файніцкага, Яраслава Зарэцкага, БЕЛТА.
