Віцебская вобласць мае намер пашыраць кааперацыю з Узбекістанам у сферы АПК
Фота з архіва 6 ліпеня, Віцебск . Віцебская вобласць гатова пашыраць кааперацыю з Узбекістанам у сферы АПК. Аб гэтым паведаміла намеснік старшыні Віцебскага аблвыканкама Анжаліка Нікіціна перад сустрэчай з прадстаўнікамі Кашкадар’інскай вобласці.
Дэлегацыя Кашкадар’інскай вобласці наведала прадпрыемствы АПК Віцебска і Віцебскага раёна, аб’екты турыстычнай накіраванасці. «Наша задача — гэта не толькі рост знешняга тавараабароту (а ў гэтым годзе ён ужо вырас у 1,6 раза), але таксама развіццё кааперацыйных сувязей у частцы перапрацоўкі прадукцыі аграпрамысловага комплексу і вырошчвання пагалоўя на жывёлагадоўчых аб’ектах. Нашы калегі з Узбекістана, у тым ліку і з Кашкадар’інскай вобласці, сёння працуюць у некаторых раёнах. Адзін з прыкладаў — вытворчасць мяса буйной рагатай жывёлы ў Лёзненскім, Докшыцкім, Гарадоцкім раёнах і іншых. Сёння культура харчавання нацэльвае нас на экалагічна чысты прадукт. Беларусь вельмі падабаецца нашым узбекскім калегам у частцы сваёй прывабнасці і прыродных рэсурсаў, таму гэта тэма будзе прадоўжана», — сказала намеснік старшыні Віцебскага аблвыканкама.
Анжаліка Нікіціна дадала, што з прадстаўнікамі Кашкадар’інскай вобласці рэалізаваны праекты па вытворчасці кабельнай прадукцыі і прадукцыі лёгкай прамысловасці. «Вельмі вялікі патэнцыял у частцы турызму. Узбекістан — гэта краіна са старажытнай гісторыяй. У нас ёсць таксама што паказаць і ў гістарычным плане, і ў культурным плане, і ў прыродна-ландшафтным — нашы ўсе запаведнікі, заказнікі», — адзначыла яна.
Як заявіла намеснік старшыні Віцебскага аблвыканкама, рэгіён мае намер развіваць і лагістычныя ланцужкі з Кашкадар’інскай вобласцю, якая знаходзіцца на мяжы з Таджыкістанам, Туркменістанам.
Прадстаўнікі Узбекістана таксама наведаюць вядучыя медыцынскія ўстановы Віцебскай вобласці. Сярод членаў дэлегацыі з Кашкадар’інскай вобласці шмат урачоў, якія з’яўляюцца загадчыкамі прыватных клінік.
