Унікальны элемент абароны дзяржавы. Ваенны эксперт растлумачыў сутнасць і задачы народнага апалчэння
Фота з архіва Навіны сюжэта «Праект «У тэме»» «Мы рыхтуемся да абароны — яны рыхтуюцца да нападзення». Эксперт параўнаў пазіцыі Беларусі і Еўропы Эксперт пра сігнал, які Лукашэнка дае Украіне: трыста разоў падумаць, ці варта прадаўжаць канфлікт 14 лістапада, Мінск . Народнае апалчэнне, створанае ў Беларусі, з’яўляецца ўнікальным элементам абароны дзяржавы, аналагаў якому фактычна няма ў іншых краінах. Такую думку ў праекце БЕЛТА «У тэме» выказаў намеснік начальніка факультэта Генеральнага штаба УС Ваеннай акадэміі Беларусі кандыдат ваенных навук Андрэй Багадзель.
«Калі гаварыць пра народнае апалчэнне, то мы па вялікім рахунку стварылі ўнікальны элемент абароны і бяспекі нашай дзяржавы. Для гэтага поўнасцю адпрацавана ўся нарматыўна-прававая база, — сказаў Андрэй Багадзель. — Цяпер мы праходзім этап станаўлення і зладжвання гэтых структур, якія ўліліся ў агульную сістэму абароны нашай краіны».
У пацвярджэнне сваіх слоў аб унікальнасці такога элемента абароны дзяржавы ваенны эксперт звярнуў увагу, што ў іншых краінах фактычна няма аналагаў беларускаму народнаму апалчэнню. Тым не менш, у некаторых дзяржавах ёсць падобныя фарміраванні, аднак іх функцыянал альбо бліжэйшы да ўзброеных сіл, альбо яны займаюць прамежкавае месца паміж народным апалчэннем і тэрытарыяльнай абаронай.
«Напрыклад, у тых жа Швецыі або Нарвегіі ёсць падраздзяленні, якія называюцца дамашняй гвардыяй. Але іх функцыянал больш звязаны з нацыянальнай гвардыяй і датычыцца выканання задач, уласцівых нашай тэрытарыяльнай абароне, — звярнуў увагу Андрэй Багадзель. — Можна прыгадаць і Саюз стралкоў Літвы, які таксама фарміруецца па тэрытарыяльнай прыкмеце. Але трэба сказаць, што гэта ў некаторым сэнсе ваенная структура: там ёсць батальёны, роты, узводы».
Вяртаючыся да сутнасці і задач народнага апалчэння, ён адзначыў, што яно з’яўляецца адным з трох складнікаў ваеннай бяспекі нараўне з Узброенымі Сіламі і тэрытарыяльнай абаронай. «Узброеныя Сілы з’яўляюцца асновай ваеннай арганізацыі дзяржавы і займаюцца непасрэдна пытаннямі яе абароны: у ваенны час адбіваюць агрэсію, а ў мірны — стрымліваюць. Тэрытарыяльная абарона таксама падпарадкоўваецца Генеральнаму штабу, выконвае дапаможную функцыю і, як вынікае з назвы, мае тэрытарыяльную прыкмету», — канстатаваў эксперт.
«А народнае апалчэнне — гэта добраахвотніцкае фарміраванне. Ахоўваючы сваю вёску або раён, свой дом, сваю сям’ю, яно ўносіць уклад у абарону ўсёй Беларусі і перш за ўсё выконвае функцыю падтрымання парадку. Пакуль Узброеныя Сілы, тэрытарыяльная абароны выконваюць задачы па адбіцці агрэсіі, народнае апалчэнне сочыць, каб ні ў кога не ўзнікла жаданне каго-небудзь абрабаваць або штосьці парушыць», — рэзюмаваў Андрэй Багадзель.
Як паведамлялася, Прэзідэнт Беларусі Аляксандр Лукашэнка 16 кастрычніка наведаў вучэбна-трэніровачныя заняткі аднаго з атрадаў народнага апалчэння. Кіраўнік дзяржавы адзначыў, што народнае апалчэнне патрэбна, каб людзі ў выпадку ваеннага часу маглі абараніць сябе, сваю сям’ю, свой населены пункт.
Беларускі лідар падкрэсліў, што яно павінна базіравацца ў пэўных вёсках у сельскім Савеце. «У вас адно падраздзяленне, добрае падраздзяленне. Але гэтага мала. І трэба нам пашырацца. Трэба недзе яшчэ ствараць такія базавыя атрады. Яны павінны быць звязаны паміж сабой», — сказаў ён.
* Праект створаны за кошт сродкаў мэтавага збору на вытворчасць нацыянальнага кантэнту
