У Гродне прэзентавалі выставу «Прыгажосць аманскага серабра: скарбы Аманскага двара»
18 верасня, Гродна . У Гродне прэзентавалі выставачны праект «Прыгажосць аманскага серабра: скарбы Аманскага двара»,
Выстава прадстаўляе найбольш яркія і цікавыя творы з калекцыі Нацыянальнага музея Султаната Аман, якія раскрываюць багацце гістарычнай і культурнай спадчыны краіны, разнастайнасць аманскай культуры, яе звычаі і традыцыі.
Як адзначыў старшыня Гродзенскага аблвыканкама Юрый Караеў, не ва ўсіх ёсць магчымасць падарожнічаць па свеце. «Таму вельмі важна, што да нас прыехаў кавалачак цывілізацыі іншага свету, іншай краіны. Гэта стала магчыма дзякуючы дружбе нашых кіраўнікоў, умацаваным сувязям паміж Рэспублікай Беларусь і Султанатам Аман, — сказаў кіраўнік вобласці. — У Гродзенскай вобласці жывуць высокаадукаваныя люді, якія цікавяцца дасягненнямі сусветнай цывілізацыі, навукі, культуры, талерантныя да любой рэлігіі, да любой культуры. І выстава серабра дазволіць нам дакрануцца да фрагмента вашай цывілізацыі, лепш даведацца, як жывуць людзі на іншым кавалку зямлі. Дзякуй за такую магчымасць».
Член Каралеўскай сям’і Султаната Аман Яе Высокасць прынцэса, спадарыня прафесар, доктар Мона бінт Фахад Аль Саід выказала вялікую радасць і гонар у сувязі з адкрыццём выставы. «Сёння мы сабраліся ў горадзе Гродне, у дружалюбнай Султанату Аман Беларусі. Мяне таксама радуе значнае развіццё, умацаванне амана-беларускіх адносін у розных сферах. У адпаведнасці з ініцыятывай Прэзідэнта Рэспублікі Беларусь Аляксандра Лукашэнкі, накіраванай на пашырэнне, абмен ведамі і культурнае ўзаемадзеянне, адбываецца абмен вопытам і прадстаўленнем твораў мастацтва паміж дзвюма дружалюбнымі краінамі. Гэта служыць працягам умацавання двухбаковых адносін паміж Султанатам Аман і дружалюбнай Рэспублікай Беларусь, — сказала яна. — Гэта выстава раскрывае значэнне аманскага серабра як гістарычна аднаго з вядучых відаў рамеснага мастацтва, а таксама прадстаўляе старанна адабраную калекцыю прадметаў».
Мастацтва апрацоўкі серабра з’яўляецца адным з важнейшых напрамкаў аманскай культуры. Са старажытных часоў упрыгожаныя серабром вырабы не толькі сведчылі аб статусе і матэрыяльным дабрабыце ўладальніка, але і служылі спосабам мастацкага самавыяўлення майстра. У экспазіцыі прадстаўлены вытанчаныя творы аманскіх майстроў: паясы, амулеты, ювелірныя ўпрыгажэнні, аксесуары з каштоўнага металу, разнастайныя прыклады традыцыйных кінжалаў — ханджараў, створаных у розныя перыяды гісторыі Амана. Ханджары, якія выкарыстоўваліся яшчэ з III тысячагоддзя да н.э., выконвалі як практычныя, так і цырыманіяльныя функцыі. Сёння ханджар з’яўляецца сімвалам краіны і адлюстраваны на гербе Амана. Вытворчасць ханджара — складанае рамяство, якое аб’ядноўвае работу з металам, дрэвам, скурай і тканінай.
Асобныя раздзелы выставы прысвечаны традыцыйным касцюмам і ювелірным упрыгажэнням, якія адлюстроўваюць рэлігійныя, сацыяльныя і эстэтычныя каштоўнасці аманскага народа. Асаблівае месца займае комплекс мемарыяльных рэчаў прынцэсы Занзібара Саіды Сальмы бінт Саід аль-Бусаідзі — аўтара твора «Мемуары арабскай прынцэсы», першай у свеце аўтабіяграфіі знатнай арабскай жанчыны.
Частка экспазіцыі знаёміць наведвальнікаў з культурай водараў — адным з традыцыйных складнікаў жыцця ўсіх рэгіёнаў Амана. На выставе прадстаўлены флаконы мужчынскіх духоў сусветна вядомага парфумернага дома Amouage, дызайн якіх быў натхнёны традыцыйным аманскім кінжалам.
Раней экспазіцыя выстаўлялася ў Нацыянальным мастацкім музеі Рэспублікі Беларусь. Таксама экспазіцыя «Прыгажосць аманскага серабра» з калекцыі Нацыянальнага музея Султаната Аман стала яркім упрыгажэннем выставачнай праграмы XXXV Міжнароднага фестывалю мастацтваў «Славянскі базар у Віцебску». У Гродне, у Музеі гісторыі рэлігій, яна будзе даступна да 20 лістапада.
Фота Леаніда Шчаглова
