Этнічнае свята эпохі ранняга сярэдневякоўя пройдзе ў Чавускім раёне 25 ліпеня
Фота з архіва 5 ліпеня, Магілёў . У аграгарадку Радамля Чавускага раёна 25 ліпеня пройдзе ХIII этнічнае свята эпохі ранняга сярэдневякоўя «У госці да радзімічаў», заснаванае на стылістыцы і падзеях IX-XI стагоддзяў. Аб гэтым БЕЛТА паведамілі ў Магілёўскім абласным метадычным цэнтры народнай творчасці і культурна-асветнай работы.
Па традыцыі аўтэнтычнае свята разгорнецца на замкавай гары. На гэтым месцы ў X стагоддзі радзімічы заснавалі сваё паселішча. Гэта гісторыя і будзе прадстаўлена ў час фестывалю.
Для гасцей свята будзе працаваць музей пад адкрытым небам, пройдуць майстар-класы па традыцыйных рамёствах, выставы-продажы вырабаў майстроў. Таксама арганізуюць разнастайныя інтэрактыўныя зоны, атракцыёны ў стылістыцы ранняга сярэдневякоўя, этнаквест для дзяцей і дарослых.
У праграме фестывалю — тэатралізаваны паказ «Падарожжа ў сівую даўніну», паказальныя баі рэканструктараў, канцэртныя праграмы запрошаных калектываў, фаер-шоу і распальванне рытуальнага вогнішча. А завершыцца свята этна-дыскатэкай.
Пачатак святочнай праграмы ў 16.30.
