У Беларусі прапрацоўваецца пытанне па карэкціроўцы мінімальнага памеру аліментаў — Мінюст
Фота з архіва 25 кастрычніка, Мінск . У Беларусі могуць змяніць мінімальны памер аліментаў. Цяпер яго ніжняя планка прывязана да бюджэту пражытачнага мінімуму — ён складае 530 рублёў 37 капеек. Аб гэтым у эфіры тэлеканала СТБ расказала намеснік начальніка ўпраўлення прававога рэгулявання і забеспячэння дзейнасці галоўнага ўпраўлення прымусовага выканання Міністэрства юстыцыі Алена Расолька, .
Заканадаўствам забяспечаны мінімальны памер аліментаў, які прывязаны да бюджэту пражытачнага мінімуму ў сярэднім на душу насельніцтва. «З 1 жніўня па 30 кастрычніка ён устаноўлены на ўзроўні 530 рублёў 37 капеек. Кожны месяц даўжнік абавязаны выплачваць аліменты, іх памер залежыць ад яго даходаў. На адно дзіця гэта 25%, на двух і больш дзяцей — 33% і 50% — на трох і больш дзяцей. Цяпер у дзяржаўных органах прапрацоўваецца пытанне па карэкціроўцы мінімальнага памеру аліментаў. І, магчыма, у бліжэйшы час будуць нейкія змяненні ў гэтым напрамку», — расказала Алена Расолька.
Яна абмалявала сацыяльны партрэт плацельшчыка аліментаў. «Як правіла, 95% — гэта мужчыны. Сярэдні ўзрост — ад 30 да 50 гадоў. Са 100 тыс. даўжнікоў, якія знаходзяцца ў нас на выкананні, больш як 75 тыс. афіцыйна працаўладкаваны і выплачваюць аліменты са сваёй заработнай платы. Найбольш эфектыўная мера — зварот спагнання на заработную плату, але калі даўжнік не працуе, утварылася запазычанасць па аліментах, то ў такой сітуацыі судовы выканаўца прымяняе комплекс мер. У першую чаргу гэта зварот спагнанняў на грашовыя сродкі, рахункі, дэпазіты, арышт і рэалізацыя ліквіднай маёмасці па месцы жыхарства, а таксама зварот спагнання на транспартны сродак, аб’екты нерухомай маёмасці. Разам з гэтым ёсць і такія эфектыўныя меры, як абмежаванне даўжніка ў праве на аказанне яму паслуг сувязі і інтэрнэту, часовае абмежаванне ў праве на кіраванне механічным транспартным сродкам, маламернымі суднамі, абмежаванне права на паляванне. Таксама мы прымяняем меру абмежавання ў праве на наведванне ігральных устаноў, у тым ліку віртуальных. Акрамя таго, судовы выканаўца мае права хадайнічаць перад судом аб абмежаванні даўжніка ў праве на выезд за межы краіны», — праінфармавала прадстаўнік Мінфіна.
Паводле яе слоў, судовыя выканаўцы праводзяць вялікую прафілактычную работу з неплацельшчыкамі аліментаў. «Калі ўжо ўсе механізмы вычарпаны, то мы ініцыюем перад органамі крымінальнага праследавання пытанне аб прыцягненні даўжніка да крымінальнай адказнасці па артыкуле 184 КК. У гэтым годзе праведзена праверка ў адносінах да больш як 2,5 тыс. асоб, і больш як палова з іх прыцягнуты да крымінальнай адказнасці», — дадала Алена Расолька.
Больш актуальных навін і аналітыкі глядзіце на VIDEOBEL.BY.
