Больш за 3 тыс. іншаземцаў дэпартавалі з Беларусі ў 2025 годзе за міграцыйныя парушэнні
Фота МУС 7 чэрвеня, Мінск . Больш за 3 тыс. іншаземцаў былі дэпартаваны з Беларусі за парушэнне міграцыйнага заканадаўства ў 2025 годзе. Аб гэтым у эфіры тэлеканала «СТБ» расказаў начальнік Дэпартамента па грамадзянстве і міграцыі МУС Іван Новікаў, .
«Іншаземцы, якія знаходзяцца на тэрыторыі Беларусі, нараўне з грамадзянамі нашай краіны не толькі карыстаюцца правамі і свабодамі, але і нясуць абавязкі. У тым ліку ведаць і выконваць Канстытуцыю нашай дзяржавы, законы, паважаць дзяржаўныя сімвалы і нацыянальныя традыцыі. За невыкананне заканадаўства Беларусі іншаземцы могуць прыцягвацца да адказнасці, у тым ліку ў адносінах да іх можа прымяняцца дэпартацыя і высылка», — заўважыў Іван Новікаў.
У прыватнасці, такія рашэнні прымаюцца ў адносінах да іншаземцаў, якія парушаюць беларускае заканадаўства, сістэматычна ўчыняюць адміністрацыйныя правапарушэнні — па агульным правіле, пяць і больш парушэнняў на працягу года, калі іншаземец лічыцца прыцягнутым да адміністрацыйнай адказнасці. У асобных выпадках іншаземец можа быць высланы з нашай краіны з-за аднаразовага грубага парушэння заканадаўства. Напрыклад, пры кіраванні транспартнымі сродкамі ў стане алкагольнага ап’янення, грубым парушэнні грамадскага парадку і іншых дзеяннях, якія ўяўляюць сабой павышаную грамадскую небяспеку.
«Безумоўна, выдварэнню з нашай краіны падлягаюць іншаземцы, асуджаныя за ўчыненне злачынстваў. Такія рашэнні прымаюцца пасля адбыцця імі пакарання на тэрыторыі нашай краіны. Пры прыняцці рашэння аб дэпартацыі і высылцы іншаземцы ўключаюцца ў спіс асоб, уезд якіх на тэрыторыю нашай краіны забаронены або непажаданы. Тэрмін такой забароны для дэпартаваных іншаземцаў складае ад 6 месяцаў да 5 гадоў. У выпадку высылкі гэты тэрмін максімальна прадугледжаны да 10 гадоў. У 2025 годзе больш за 3 тыс. іншаземцаў былі дэпартаваны за парушэнне міграцыйнага заканадаўства», — дадаў Іван Новікаў.
Паводле яго слоў, больш за 1,5 тыс. замежных грамадзян былі высланы з Беларусі, у тым ліку ў інтарэсах грамадскага парадку, у прыватнасці за адміністрацыйныя правапарушэнні, звязаныя з ігнараваннем правіл дарожнага руху, уключаючы сістэматычнае парушэнне скораснага рэжыму.
