Беларусь і Расія плануюць распрацаваць 40 новых стандартаў у сферы станкабудавання
Фота Дзяржстандарту 25 мая, Мінск . Беларусь і Расія плануюць распрацаваць 40 новых стандартаў у сферы станкабудавання. Гэта абмяркоўвалася на сустрэчы старшыні Дзяржаўнага камітэта па стандартызацыі Алены Маргуновай і кіраўніка прадстаўніцтва Ніжагародскай вобласці Расійскай Федэрацыі ў Беларусі Андрэя Дудкіна, паведамілі ў прэс-службе Дзяржстандарту.
«Пытанне стандартызацыі з боку і расійскіх, і беларускіх прадпрыемстваў з’яўляецца ключавым для развіцця гандлёва-эканамічных сувязей. У першую чаргу гэта датычыцца распрацоўкі адзіных патрабаванняў, прызнання дакументаў аб ацэнцы адпаведнасці. Задача нашай сустрэчы — удакладніць гэты механізм, каб дапамагчы нашым прадпрыемствам і ўдыхнуць новы струмень у развіццё гандлёва-эканамічных узаемаадносін», — сказаў Андрэй Дудкін.
У сваю чаргу Алена Маргунова падкрэсліла высокі ўзровень супрацоўніцтва Беларусі і Расіі ў сферы тэхнічнага рэгулявання, асабліва на ўзроўні Дзяржстандарту і Расстандарту, яго пастаяннае напаўненне новымі напрамкамі і праектамі. «Цяпер рэалізуецца пяць планаў стандартызацыі Саюзнай дзяржавы ў сферах дзіцячага харчавання, энергазберажэння і павышэння энергетычнай эфектыўнасці, у галіне грузавых аўтамабіляў і электробусаў, станкабудавання, — праінфармавала старшыня Дзяржстандарту. — Дакументы прадугледжваюць распрацоўку новых саюзных стандартаў, адзіныя патрабаванні якіх важны для гандлю, кааперацыі і абароны інтарэсаў спажыўцоў».
Па выніках праведзенай дыскусіі бакі дамовіліся ўдзяліць асаблівую ўвагу стандартызацыі ў галіне станкабудавання, у тым ліку з удзелам профільных органаў дзяржкіравання дзвюх краін. Прыняты адпаведны план уключае распрацоўку 40 новых стандартаў на розныя віды станкоў і абсталявання. Гэта важна як з пункту гледжання ўстанаўлення адзіных патрабаванняў, так і развіцця кааперацыі расійскіх і беларускіх вытворцаў.
Узнімаліся пытанні ў сферы пацвярджэння адпаведнасці прадукцыі пры ўзаемных пастаўках. На практыцы яны часам узнікаюць у суб’ектаў гаспадарання. Для павышэння дасведчанасці бізнесу дасягнута дамоўленасць аб правядзенні сумеснага семінара з Гандлёва-прамысловай палатай Ніжагародскай вобласці і адукацыйным цэнтрам «Акадэмія якасці» БелДІСС. Прадстаўніцтвам Ніжагародскай вобласці Расійскай Федэрацыі ў Беларусі ў бліжэйшы час будзе сфармуляваны пул пытанняў, якія ўяўляюць цікавасць для рэгіянальнага бізнесу. У якасці першачарговай тэматыкі абазначалася сфера электратэхнікі. Дзяржстандарт і яго арганізацыі адкрыты для ўзаемадзеяння і аказання інфармацыйна-метадычнай дапамогі, гатовы дзяліцца сваім вопытам, выступаць у якасці спікераў.
Таксама закраналіся аспекты стандартызацыі ў лёгкай прамысловасці, у прыватнасці, вопыт краін у сферы вытворчасці школьнай формы, высокай якасці беларускай прадукцыі і ўдасканалення механізмаў яе прасоўвання на расійскім рынку. Адзначалася важнасць паскарэння тэрмінаў рэалізацыі тых ці іншых сумесных праектаў, паколькі запыты рынку становяцца ўсё больш хутка зменлівымі.
Бакі падкрэслілі актуальнасць стварэння Камітэта па стандартызацыі і якасці Саюзнай дзяржавы, выказаўшы ўпэўненасць у запатрабаванасці яго дзейнасці для бізнесу і спажыўцоў. Першае пасяджэнне новай структуры запланавана правесці ў рамках XIII Форуму рэгіёнаў Беларусі і Расіі 25 чэрвеня ў Маладзечне.
Алена Маргунова запрасіла дэлегацыю прадстаўніцтва Ніжагародскай вобласці Расійскай Федэрацыі ў Беларусі наведаць інстытуты Дзяржстандарту, азнаёміцца з іх магчымасцямі і знайсці новыя пункты судакранання для сумеснай работы ў агульных інтарэсах.
