Спрашчэнне доступу на электронныя пляцоўкі, абмен цэнавай інфармацыяй. Беларусь і Узбекістан актывізуюць біржавы гандаль
Фота БУТБ 13 ліпеня, Мінск . Беларусь і Узбекістан плануюць наладзіць больш цеснае супрацоўніцтва ў сферы закупак. Аб гэтым паведамілі у прэс-службе Беларускай універсальнай таварнай біржы (БУТБ).
Краіны маюць намер павышаць уключанасць беларускіх і ўзбекскіх таваравытворцаў у закупачных працэдурах, якія праводзяцца на тэрыторыі дзвюх краін. Плануецца прапрацаваць магчымасць спрашчэння ўзаемнага доступу ўдзельнікаў на адпаведныя электронныя пляцоўкі ў Беларусі і Узбекістане, а таксама арганізаваць рэгулярны абмен цэнавай інфармацыяй і вопытам укаранення лічбавых тэхналогій у галіне дзяржаўных закупак і закупак за кошт уласных сродкаў.
Гэтыя пытанні абмяркоўваліся ў час візіту ў цэнтральны офіс Беларускай універсальнай таварнай біржы дырэктара Цэнтра павышэння эфектыўнасці праектаў і закупак Узбекістана Нажміддзінхаджы Шарыпава і генеральнага дырэктара ТАА «Тэхнапарк» Сарвара Ахадава. «Зусім нядаўна кіраўнікі нашых дзяржаў падпісалі Дэкларацыю аб устанаўленні стратэгічнага партнёрства, якая накіравана ў тым ліку на паглыбленне двухбаковага гандлёва-эканамічнага супрацоўніцтва. У святле гэтага актывізацыя ўзаемадзеяння ў закупачнай сферы будзе садзейнічаць умацаванню дзелавых кантактаў і росту тавараабароту, прычым не толькі за кошт сыравінных пазіцый, але і прадукцыі з высокай дабаўленай вартасцю», — упэўнены Нажміддзінхаджа Шарыпаў.
У сваю чаргу старшыня праўлення БУТБ Аляксандр Асмалоўскі акцэнтаваў увагу на агульнасці падыходаў, што прымяняюцца ў Беларусі і Узбекістане пры фарміраванні біржавога таварнага рынку і пабудове сістэмы дзяржаўных і карпаратыўных закупак, і выказаў гатоўнасць арганізаваць сумесную работу па напрамках, якія ўяўляюць узаемны інтарэс. «У частцы біржавога гандлю мы плённа супрацоўнічаем з Узбекскай рэспубліканскай таварна-сыравіннай біржай як у двухбаковым, так і шматбаковым фармаце. Мы актыўна дзелімся інфармацыяй, вопытам і экспертызай, рэалізуем сумесныя праекты па лініі біржавой адукацыі і ўзаемнай акрэдытацыі брокераў. Што датычыцца міжнародных ініцыятыў, то цяпер абедзве нашы біржы сумесна з калегамі з Расіі, Казахстана і Кыргызстана ствараюць міжнародную сістэму індыкатараў таварных рынкаў. Мэта праекта — забяспечыць кампаніі з краін ЕАЭС і Узбекістана аб’ектыўнымі і рэпрэзентатыўнымі данымі аб цэнах на ключавыя таварныя пазіцыі, задзейнічаныя ў трансгранічных здзелках. Інакш кажучы, Узбекістан для нас — стратэгічны партнёр, і мы гатовы пашыраць супрацоўніцтва», — падкрэсліў Аляксандр Асмалоўскі.
Паводле даных БУТБ, за першае паўгоддзе 2026 года сума здзелак узбекскіх удзельнікаў біржавых таргоў перавысіла $66 млн, што на 21 працэнт больш, чым за аналагічны перыяд 2025 года. Колькасць акрэдытаваных на біржы рэзідэнтаў Узбекістана з пачатку года павялічылася на 30, да 282 кампаній.
ААТ «Беларуская ўніверсальная таварная біржа» створана ў 2004 годзе. Першыя таргі адбыліся ў чэрвені 2005 года. БУТБ — адна з буйнейшых таварных біржаў ва Усходняй Еўропе. Яе галоўная функцыя — садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаецца метала-, леса-, сельгаспрадукцыя, прамысловыя і спажывецкія тавары шырокай наменклатуры.
