Ад гандлю да інвестыцыйных праектаў. Якія напрамкі супрацоўніцтва будуць развіваць Беларусь і Алтай
29 кастрычніка, Мінск . Беларусь і Алтай плануюць пашыраць узаемадзеянне ў галіне гандлю, прамысловай кааперацыі і інвестыцый. Аб гэтым ішла размова ў час VII пасяджэння рабочай групы па супрацоўніцтве Беларусі і Алтая,
Мерапрыемства прайшло пад сустаршынствам міністра прыродных рэсурсаў і аховы навакольнага асяроддзя Максіма Лысенкі і кіраўніка Рэспублікі Алтай Андрэя Турчака.
Максім Лысенка падкрэсліў, што Расія працягвае заставацца ключавым стратэгічным партнёрам Беларусі на міжнароднай арэне, а супрацоўніцтва з Алтаем — прыклад эфектыўнага ўзаемадзеяння на рэгіянальным узроўні. «Мы знаходзімся ў працэсе сумеснага пошуку шляхоў узаемавыгаднага супрацоўніцтва ў розных сферах, і гэту работу важна прадаўжаць. Упэўнены, што сённяшні візіт надасць магутны імпульс нашаму супрацоўніцтву, а ўстаноўленыя асабістыя кантакты будуць садзейнічаць аператыўнаму і эфектыўнаму вырашэнню любых пытанняў», — сказаў ён.
Міністр адзначыў, што ў бягучым годзе эканамічная дынаміка крыху знізілася. «Гэта сведчыць аб тым, што нам неабходна сумесна прааналізаваць прычыны такой дынамікі і знайсці інструменты для яе аднаўлення. Разам з тым у сучасных умовах бачым вялікі патэнцыял для сумеснай работы. Са свайго боку мы падтрымліваем любыя ініцыятывы як беларускага, так і расійскага боку, якія будуць садзейнічаць як замацаванню ўжо ўстаноўленых сувязей, так і выпрацоўцы новых напрамкаў узаемадзеяння», — дадаў Максім Лысенка.
Беларусь зацікаўлена ў развіцці не толькі прамысловай кааперацыі, стаяць мэты па пашырэнні гарызонтаў супрацоўніцтва ў сферы адукацыі, навукі, аховы здароўя, культуры і высокіх тэхналогій.
Андрэй Турчак адзначыў, што ўзаемадзеянне паміж рэспублікамі рытмічна развіваецца і становіцца ўсё больш прадметным. «Сфарміравана добрая база для супрацоўніцтва. З 2018 года дзейнічае пагадненне аб супрацоўніцтве ў гандлёва-эканамічнай, навукова-тэхнічнай і сацыяльна-культурнай сферах. Мы дамовіліся пашыраць пастаўкі на Алтай беларускай камунальнай і сельгастэхнікі, актыўна развіваць гандлёвыя дзелавыя сувязі, паставілі задачу падрыхтаваць мемарандум аб супрацоўніцтве ў галіне аховы навакольнага асяроддзя. Важна, каб наша супрацоўніцтва не абмяжоўвалася гандлем і абменамі дэлегацый, настаў час гаварыць аб сумесных інвестыцыйных праектах».
Па выніках пасяджэння былі падпісаны пратакол VII пасяджэння рабочай групы, праграма дзеянняў па рэалізацыі асноўных напрамкаў пагаднення паміж урадам Беларусі і ўрадам Алтая на 2027-2030 гады ў рамках развіцця і ўмацавання інтэграцыйных працэсаў Саюзнай дзяржавы, а таксама мемарандум аб узаемаразуменні па пытаннях супрацоўніцтва ў галіне аховы навакольнага асяроддзя паміж Міністэрствам прыродных рэсурсаў і аховы навакольнага асяроддзя Беларусі і Міністэрствам прыродных рэсурсаў і экалогіі Алтая. 
