Прыгожыя вокладкі, вытанчаныя форзацы. Аб эстэтыцы мадэрну ў афармленні кніг раскажа выстава ў Гомелі
Фота Гомельскага палацава-паркавага ансамбля 4 кастрычніка, Гомель . У Гомелі ў палацы Румянцавых і Паскевічаў у экспазіцыі «Княжацкая бібліятэка» 9 кастрычніка адкрыецца выстава «XX стагоддзе пачынаецца. Мадэрн у афармленні кнігі», падрыхтаваная ў партнёрстве з Музеем рэдкай кнігі Гомельскай абласной універсальнай бібліятэкі імя У.І.Леніна. Аб гэтым паведамілі БЕЛТА ў гомельскім палацава-паркавым ансамблі.
«Мадэрн — маштабны мастацкі рух мяжы XIX-XX стагоддзяў, які ахапіў самыя розныя напрамкі ў творчасці і ставіў за мэту пошук гармоніі ў прамысловую эпоху і пераўтварэнне жыцця сродкамі мастацтва. Імкненне спалучаць утылітарнасць і прыгажосць у кожным прадмеце знайшло асабліва яркае адлюстраванне ў кніжным мастацтве», — звярнулі ўвагу ва ўстанове.
Так з’явілася канцэпцыя ідэальнай кнігі — цэласнага арт-аб’екта, у якім кожная дэталь, няхай гэта будзе шрыфт ці папера, важная і неаддзельная ад агульнай задумы твора. «Графічнасць, першапачаткова ўласцівая кнізе, апынулася сугучная мастацкай мове мадэрну, што разам з новымі тэхнічнымі распрацоўкамі садзейнічала небываламу росквіту кніжнай справы. Выдаўцы сталі прыцягваць да работы над ілюстрацыямі і дэкаратыўнымі элементамі таленавітых мастакоў, крыніцай натхнення якіх служыла не толькі прырода, але і мастацтва мінулых эпох: яны пераасэнсоўвалі і стылізавалі яго, ствараючы новыя формы і вобразы», — адзначылі ў палацава-паркавым ансамблі.
Наведвальнікі выставы «XX стагоддзе пачынаецца. Мадэрн у афармленні кнігі» убачаць кнігі і часопісы, у афармленні якіх знайшлі яркае адлюстраванне найбольш выразныя рысы эстэтыкі мадэрну: асіметрыя, плаўныя, выгнутыя лініі, стылізаваныя раслінныя арнаменты. «Прыгожыя вокладкі, вытанчаныя форзацы, мудрагелістыя віньеткі дазволяць у поўнай меры адчуць, які вялікі ўплыў на ўспрыманне тэксту аказвае яго візуальнае ўвасабленне і як гармонія паміж зместам і знешнім абліччам кнігі ператварае яе ў сапраўдны твор мастацтва», — падкрэслілі ў дзяржаўнай гісторыка-культурнай установе.
