Прэм’ер-міністр Казахстана: Беларусь — надзейны і правераны часам партнёр
Алжас Бекценаў 1 кастрычніка, Мінск . Беларусь для Казахстана — надзейны і правераны часам партнёр, саюзнік. Аб гэтым заявіў прэм’ер-міністр Казахстана Алжас Бекценаў на перагаворах у Доме ўрада з прэм’ер-міністрам Беларусі Аляксандрам Турчыным,
«Нас звязвае доўгая агульная гісторыя, узаемны давер. Усё гэта заснавана на вельмі даверных і рэгулярных кантактах паміж лідарамі нашых краін, — адзначыў Алжас Бекценаў. — Задача двух урадаў — актыўна рэалізоўваць тыя дамоўленасці, якія паміж нашымі лідарамі дасягнуты. І ў гэтым напрамку, лічу, дынаміка нядрэнная. Лічбы аб гэтым сведчаць».
Алжас Бекценаў звярнуў увагу на значны рост тавараабароту і зачын для далейшага нарошчвання ўзаемадзеяння. Перспектыўныя напрамкі ў тым ліку абмяркоўваліся ў мінулым годзе ў час візіту ў Казахстан беларускай дэлегацыі. Бакі змаглі абмяняцца думкамі па шырокім спектры тэм узаемнага супрацоўніцтва, што ў тым ліку надало яму імпульс.
Наладжана прамысловая кааперацыя — 16 сумесных праектаў, 13 рэалізаваны, тры знаходзяцца на розных стадыях рэалізацыі. Агульная сума інвестыцый перавышае $200 млн. Гэта і вытворчасць трактароў і камбайнаў. Разглядаюцца новыя напрамкі, у прыватнасці ў сферы чыгуначнага машынабудавання. «Ёсць магчымасці і жаданне пашыраць гандаль паміж нашымі краінамі, пералік прадукцыі, якую пастаўляем у Беларусь», — адзначыў Алжас Бекценаў.
Дэлегацыя Казахстана сумесна з іншымі ганаровымі гасцямі наведае выстаўку «ІНАПРАМ. Беларусь». Гэта пляцоўка — яшчэ адна магчымасць бізнесу наладзіць партнёрства і пашырыць кантакты. «Урад Казахстана мае цвёрды намер працаваць у напрамку актывізацыі, пашырэння, паглыблення разнапланавага супрацоўніцтва з Беларуссю», — запэўніў Алжас Бекценаў.
Па выніках перагавораў падпісаны шэраг двухбаковых дакументаў. У іх ліку планы мерапрыемстваў аб гандлёва-эканамічным, навукова-тэхнічным і культурным супрацоўніцтве паміж Гродзенскай і Кастанайскай, Мінскай і Паўладарскай, Гомельскай і Паўладарскай абласцямі на 2026-2028 гады, мемарандум аб супрацоўніцтве, а таксама план мерапрыемстваў на 2027-2028 гады паміж Магілёўскім абласным выканаўчым камітэтам і акіматам Туркестанскай вобласці аб супрацоўніцтве ў гандлёва-эканамічнай, навукова-тэхнічнай і сацыяльнай сферах.
Фота Віталя Піваварчыка
