Тавары Саюзнай дзяржавы і адзіная аграрная палітыка: як Беларусь і Расія развіваюць узаемадзенне
1 кастрычніка, Мінск . Беларусь і Расія развіваюць узаемадзеянне па шырокім коле напрамкаў, у ліку якіх прамысловая кааперацыя, сельская гаспадарка, транспартная сфера. Аб дасягнутых выніках і далейшых планах расказаў прэм’ер-міністр Беларусі Аляксандр Турчын на пасяджэнні Савета Міністраў Саюзнай дзяржавы,
«На сённяшняе пасяджэнне вынесены шэраг апорных пытанняў, якія датычацца стратэгічных задач нашага саюза на бліжэйшую перспектыву. Перш за ўсё маю на ўвазе разгляд асноўных напрамкаў рэалізацыі палажэнняў Дагавора аб стварэнні Саюзнай дзяржавы на чарговы трохгадовы перыяд. Акцэнт у дакуменце робім на развіцці ключавых сфер — прамысловая палітыка, тэхналагічны суверэнітэт, забеспячэнне харчовай бяспекі, транспарт, энергетыка, ахова здароўя і турызм», — сказаў Аляксандр Турчын.
Ключавым фактарам эканамічнай бяспекі Саюзнай дзяржавы з’яўляецца імпартазамяшчэнне ў прамысловасці. Сёння рэалізоўваюцца 24 сумесныя імпартазамяшчальныя інвестыцыйныя праекты. Беларускі МАЗ і расійская група кампаній «Ітэлма» стварылі электробус з практычна поўнай лакалізацыяй — з беларускіх і расійскіх камплектуючых. БЕЛАЗ і «Нарнікель» рэалізуюць перспектыўны праект па стварэнні прадпрыемства па вытворчасці і капітальным рамонце падземнай горнай тэхнікі. Ён накіраваны на імпартазамяшчэнне пагрузачна-даставачных машын і шахтавых самазвалаў, якія працуюць як на дызельным паліве, так і на альтэрнатыўных крыніцах энергіі. «Дарэчы, гэта гатовы прэтэндэнт на статус тавару Саюзнай дзяржавы. Такіх праектаў павінна быць больш, таму што пашырэнне кааперацыі ў вытворчым сектары непасрэдна ўплывае на павышэнне канкурэнтаздольнасці нашых тавараў», — адзначыў прэм’ер-міністр.
Нядаўна створаны Камітэт па стандартызацыі і якасці Саюзнай дзяржавы, дзейнасць якога стане фільтрам ад экспансіі няякасных тавараў і будзе садзейнічаць устараненню тэхнічных бар’ераў ва ўзаемным гандлі. Запушчаны праект «Тавар Саюзнай дзяржавы»: першымі ў якасці такіх прызнаны кар’ерны самазвал БЕЛАЗ і аўтобусы МАЗ. «Цяпер важна напоўніць статус рэальным зместам. Гэта можа быць забеспячэнне роўнага доступу саюзнай прадукцыі да дзяржаўных, муніцыпальных і карпаратыўных закупак у абедзвюх краінах, асаблівыя ўмовы крэдытавання і іншае», — зрабіў акцэнт кіраўнік беларускага ўрада.
Прадаўжаецца ўзаемадзеянне ў сферы сельскай гаспадаркі. «Міністэрствы змаглі дасягнуць разумення па пагадненні аб адзінай аграрнай палітыцы, чакаем падпісання дакумента да канца года. Гэта ў першую чаргу дасць магчымасць пачаць практычную рэалізацыю праектаў Саюзнай дзяржавы ў мэтах павышэння ўзроўню харчовай бяспекі», — падкрэсліў Аляксандр Турчын.
Дадатная дынаміка адзначаецца ў транспартнай сферы. За сем месяцаў гэтага года праз расійскія парты перавезена больш за 9 млн т беларускіх экспартных грузаў, гадавы прырост — амаль 8%.
На пасяджэнні былі разгледжаны 15 пытанняў, накіраваных на далейшае інтэграцыйнае збліжэнне Беларусі і Расіі. Ключавымі тэмамі пасяджэння сталі разгляд ходу выканання асноўных напрамкаў рэалізацыі палажэнняў Дагавора аб стварэнні Саюзнай дзяржавы на 2024-2026 гады і адабрэнне асноўных напрамкаў на 2027-2029 гады. Прыняты рашэнні ў мэтах забеспячэння павышэння эфектыўнасці работы Пастаяннага камітэта СД. Шэраг рашэнняў Савета Міністраў Саюзнай дзяржавы накіраваны на рэалізацыю сумесных праектаў у сферы пасажырскіх чыгуначных перавозак. Акрамя таго, вызначана тэматыка работы вышэйшых органаў СД на наступны год.
Пасяджэнне Савета Міністраў Саюзнай дзяржавы завяршылася цырымоніяй падпісання дакументаў. 
Фота Віталя Піваварчыка
