У час праверкі батальёна механізаванай брыгады прайшлі заняткі па агнявой падрыхтоўцы
Фота «Ваяр» 15 кастрычніка, Мінск . У час праверкі аднаго з батальёнаў 6-й асобнай гвардзейскай механізаванай брыгады на палігоне Заходняга аператыўнага камандавання прайшлі кантрольныя заняткі па агнявой падрыхтоўцы. Аб гэтым БЕЛТА паведамілі ў прэс-службе Міністэрства абароны Беларусі.
Дзяржаўны сакратар Савета бяспекі Аляксандр Вальфовіч сёння наведаў адзін з палігонаў Заходняга аператыўнага камандавання, дзе азнаёміўся з ходам праверкі і назіраў за баявой стральбой мотастралковага падраздзялення ў рамках кантрольнага занятку па агнявой падрыхтоўцы. «Раптоўная праверка боегатоўнасці падраздзяленняў Узброеных Сіл да выканання задач па прызначэнні прадаўжаецца. Цяпер здае экзамен адзін з механізаваных батальёнаў Заходняга аператыўнага камандавання. Гэта ўжо другі па ліку механізаваны батальён», — дадаў ён.
«Танкісты здалі экзамен, артылерысты таксама здалі экзамен у ходзе сапраўды працяглага часу з поўным комплексам мерапрыемстваў па перавядзенні з мірнага на ваенны час з выкананнем агнявых задач. Артылерыя паказала сябе вельмі нядрэнна: практычна ўсе задачы вырашаны толькі на добрыя і выдатныя ацэнкі», — сказаў Аляксандр Вальфовіч.
Паводле яго слоў, правяраемы батальён ва ўстаноўленыя тэрміны быў прыведзены ў гатоўнасць да выканання задач па прызначэнні, пасля чаго адбыўся агляд гатоўнасці падраздзялення. «Тэрмін гатоўнасці не перавышаў трох гадзін — гэта даволі кароткі прамежак часу. Уражанні службовых асоб Дзяржсакратарыята па праверцы батальёна вельмі станоўчыя. Батальён ажыццявіў у начных умовах марш з пункта пастаяннай дыслакацыі на палігон, дзе пачаў кантрольныя заняткі па агнявой і тактычнай падрыхтоўцы, наперадзе яшчэ фізічная падрыхтоўка», — падкрэсліў ён.
«Прафесіяналізм мотастралкоў за гэтыя паўгода вырас значна, — адзначыў Аляксандр Вальфовіч. — Даволі ўпэўненыя навыкі ў дзеяннях пры ўзбраенні БМП, валоданні стралковай зброяй паказваюць мотастралкі Заходняга аператыўнага камандавання. Гэта заканамерна, паколькі большасць ваеннаслужачых гэтага батальёна ўжо прайшлі поўную праграму навучання. Яны павінны паказваць і паказваюць высокія вынікі».
«Ацэнку ўсяму батальёну цяпер ставіць рана: праверка яшчэ ў самым разгары. Самае галоўнае, што настрой афіцэраў, камандзіра батальёна выклікае ўпэўненасць у тым, што батальён здольны выканаць тыя задачы, якія будуць яму пастаўлены», — дадаў дзяржаўны сакратар Савета бяспекі.
