Новая Гарадская інфекцыйная бальніца адкрыта ў Мінску
30 кастрычніка, Мінск . Урачыстая цырымонія адкрыцця новай Гарадской інфекцыйнай бальніцы адбылася 30 кастрычніка ў Мінску з удзелам Прэзідэнта Беларусі Аляксандра Лукашэнкі,
Кіраўнік дзяржавы ў прысутнасці працоўных калектываў медыцынскай установы, ААТ «Будтрэст №35» — тых, хто прымаў удзел у будаўніцтве новага комплексу, а таксама службовых асоб перарэзаў сімвалічную чырвоную стужку.
Адкрыццё аб’екта прымеркавана да надыходзячага свята — Дня Кастрычніцкай рэвалюцыі.
«Пабудавалі хутка, малайцы. Своечасова. Як і даручана было. Гэта з жыцця бальніца, з нашай практыкі», — сказаў Прэзідэнт, маючы на ўвазе перыяд пандэміі.
Аляксандр Лукашэнка адзначыў, што бальніца мае ўласную інфраструктуру, дзякуючы якой патокі руху пацыентаў і медработнікаў максімальна раздзелены. Гэта не дасць распаўсюдзіцца інфекцыі ўнутры ўстановы. Таксама, паводле яго слоў, бальніца больш падобная да жылога комплексу, а не да медыцынскай установы.
«Але ніякіх не павінна быць празмернасцей — мы вялікія грошы трацім на ахову здароўя. Павінна быць утульна, паслугі павінны аказвацца як мае быць», — сказаў кіраўнік дзяржавы.
Прэзідэнт звярнуў увагу, што ўнікальнасць аб’екта не толькі ў яго камфартабельнасці і аснашчанасці — пры будаўніцтве бальніцы выкарыстоўваліся лёгкія стальныя танкасценныя канструкцыі, дзякуючы чаму ўдалося скараціць тэрміны ўзвядзення і яго кошт.
«Галоўная перавага гэтай тэхналогіі — магчымасць пры неабходнасці аператыўна ажыццявіць перапланіроўку. А ў выпадку, не дай бог, новай эпідэміі зможам павялічыць магутнасці стацыянара ў два разы», — заявіў Аляксандр Лукашэнка.
З нагоды адкрыцця Прэзідэнт падарыў новай інфекцыйнай бальніцы Мінска сучасны апарат штучнай вентыляцыі лёгкіх ад вядучага сусветнага вытворцы з Кітая. Ён дапамагае пры цяжкіх формах рэспіраторных інфекцый, забяспечваючы арганізм кіслародам і дазваляючы выйграць час, неабходны для дзеяння лякарстваў і таго, каб чалавек паправіўся.
Бальнічны гарадок новай інфекцыйнай бальніцы размешчаны ў Цэнтральным раёне Мінска паблізу Даўгінаўскага тракта. Дзеючая цяпер Гарадская клінічная інфекцыйная бальніца знаходзіцца ў цэнтры горада, яе структурныя падраздзяленні размешчаны ў асобных будынках, у тым ліку 1913 года пабудовы.
Новы аб’ект спраектаваны як адзіны ў Беларусі інфекцыйны стацыянар, здольны працаваць з інфекцыямі ўсіх узроўняў, у тым ліку IV узроўню біялагічнай небяспекі (вышэйшага) за кошт пабудовы лячэбных аддзяленняў накшталт поўных мельцэраўскіх боксаў.
Новая бальніца аснашчана высокаэфектыўнымі сістэмамі інфекцыйнага кантролю для мінімізацыі рызыкі распаўсюджвання ўзбуджальнікаў інфекцыйных захворванняў, рэанімацыйным блокам новага пакалення з тэхналогіямі мультыпараметрычнага маніторынгу, сучасным лабараторным, дыягнастычным і лячэбным абсталяваннем, якое дазваляе выяўляць і лячыць усе патэнцыяльна магчымыя на тэрыторыі краіны інфекцыйныя захворванні.
Установа аховы здароўя таксама зможа павялічваць магутнасць не менш як у два разы пры неабходнасці барацьбы з эпідэміямі і пандэміямі пры ўскладненні эпідэмічнай абстаноўкі.
