«Неабходна было збіць хвалю». Крупко аб заявах Зяленскага ў адрас Беларусі
Іван Крупко 23 чэрвеня, Гомель . Заява-ўльтыматум Уладзіміра Зяленскага ў адрас Беларусі і кіраўніка беларускай дзяржавы — спроба збіць хвалю ў сітуацыі з абстрэлам аўтобуса з дзецьмі ў Бранскай вобласці. Гэта падкрэсліў старшыня Гомельскага аблвыканкама Іван Крупко ў размове з журналістамі па выніках даклада Аляксандру Лукашэнку,
«Гэту вострую тэму нельга было абысці ў час даклада. І кіраўнік дзяржавы цікавіўся, як на гэта рэагуюць людзі, як складваецца сітуацыя», — расказаў Іван Крупко.
«Аналізуючы розныя меркаванні, каментарыі людзей, напэўна, Уладзіміру Зяленскаму неабходна было збіць хвалю ў сітуацыі з абстрэлам аўтобуса, дзе пацярпелі нашы дзеці. Узнялася новая хваля з пытаннем, якога фактычна няма. Мы разумеем, што гэтыя трукі, хітрасці адводзяць увагу ад асноўнай тэмы, якая абмяркоўваецца сёння жыхарамі Гомельскай вобласці і ўсёй краіны, — ад трагедыі з аўтобусам. Гэта сітуацыя атрымлівае жорсткую ацэнку людзей», — звярнуў увагу Іван Крупко.
Старшыня аблвыканкама далажыў Прэзідэнту і аб тым, як разгортвалася сітуацыя пасля трагедыі, як зладжана працавалі беларускі і расійскі бакі, як каардынаваліся дзеянні па аказанні медыцынскай і псіхалагічнай дапамогі і арганізацыі вяртання дарослых і дзяцей дадому. «Я далажыў кіраўніку дзяржавы аб зладжанай рабоце з урадам, Адміністрацыяй Прэзідэнта, усімі беларускімі міністэрствамі. Ад усіх адчувалася вельмі сур’ёзная падтрымка», — адзначыў кіраўнік вобласці, даклады якога кожную гадзіну ішлі старшыні ўрада, кіраўніку Адміністрацыі Прэзідэнта.
«Вядзецца сур’ёзная работа па рэабілітацыі дзяцей і дарослага. Усе гэтыя моманты з самых першых хвілін дакладваліся кіраўніку дзяржавы, і сітуацыя была пад строгім кантролем», — сказаў Іван Крупко, нагадаўшы, што прадаўжаюцца і следчыя дзеянні.
Фота Марыны Васільевай
