Ад дружбы — да сумесных праектаў. Галоўнае аб візіце Прэзідэнта Манголіі ў Беларусь
Першы афіцыйны візіт Прэзідэнта Манголіі Ухнаагійн Хурэлсуха ў Беларусь стаў прадаўжэннем дыялогу на вышэйшым узроўні, пачатага ва Улан-Батары ў 2024 годзе. У час перагавораў у Палацы Незалежнасці бакі дамовіліся развіваць прамысловую кааперацыю, сельскую гаспадарку, транспартную лагістыку і лёгкую прамысловасць, паставіўшы мэту патроіць тавараабарот да 2029 года. А бізнес-форум у Мінску завяршыўся падпісаннем амаль двух дзясяткаў дакументаў на $50 млн. Што стаіць за гэтымі дамоўленасцямі і якія перспектывы яны адкрываюць, чытайце ў аглядзе .
Калі адлегласць не перашкода
Адлегласць паміж Мінскам і Улан-Батарам — тысячы кіламетраў. Але геаграфія не перашкодзіла Беларусі і Манголіі за апошнія два гады прыкметна актывізаваць палітычны дыялог, а цяпер перайсці да больш прадметнага абмеркавання эканамічнага ўзаемадзеяння.
Да афіцыйных перагавораў прэзідэнты правялі ў выхадныя нефармальную сустрэчу. Кіраўнік беларускай дзяржавы запрасіў свайго мангольскага калегу да сябе ў госці.
«Я прапанаваў бы, каб мы пачалі з двух-трох важных для нас з Манголіяй праектаў і пачалі наша супрацоўніцтва, каб мы далі старт вельмі інтэнсіўнаму нармальнаму супрацоўніцтву, — адразу акрэсліў прыярытэты Аляксандр Лукашэнка. — Нас не зразумеюць нашы дзеці, калі нашы з вамі пакаленні не зробяць нешта вялікае, як папярэдняе пакаленне. Так, мы гандлюем. Але, згадзіцеся, аб’ёмы таго гандлю, які сёння ў нас ёсць, проста смешныя». 
Ухнаагійн Хурэлсух падтрымаў такі падыход. А яшчэ расказаў, што паспеў пабываць у музеі гісторыі Вялікай Айчыннай вайны, азнаёміўся з работай адукацыйнага цэнтра бяспекі жыццядзейнасці МНС Беларусі і ўзорамі розных відаў тэхнікі беларускай вытворчасці. 
Дарэчы, не ўсе пра гэта ведаюць, але Манголія была першай дзяржавай у свеце, якая ў першы ж дзень нападзення нацысцкай Германіі і яе саюзнікаў на Савецкі Саюз падтрымала краіну дыпламатычным удзелам і ўсімі відамі маральнай і матэрыяльнай дапамогі. Мінскі музей захоўвае шмат экспанатаў, якія адлюстроўваюць супрацоўніцтва дзвюх краін у сярэдзіне мінулага стагоддзя. 
Проціпажарная тэматыка таксама па-асабліваму цікавая Манголіі: Улан-Батар не па чутках знаёмы з беларускай выратавальнай тэхнікай. Але ёсць і яшчэ адзін цікавы факт: Ухнаагійн Хурэлсух быў заснавальнікам выратавальнага ведамства Манголіі і ў свой час узначальваў яго. Таму ацаніць вопыт і магчымасці Беларусі ў папярэджанні і ліквідацыі надзвычайных сітуацый ён захацеў асабіста.
«Мы ажыццяўляем розныя дзяржаўныя візіты ў іншыя краіны, але наведаць Беларусь і азнаёміцца з Мінскам — зусім іншы свет. Таму што, у адрозненне ад іншых сталіц, гэта для мяне здаецца раем на зямлі. Тут клімат, прырода вельмі цудоўныя. Вельмі спадабалася ваша краіна, у тым ліку сталіца Мінск і інфраструктура», — падзяліўся Прэзідэнт Манголіі сваімі першымі ўражаннямі.
На наступны дзень Аляксандр Лукашэнка раскажа, што ў час нефармальнай сустрэчы бакі каля трох гадзін абмяркоўвалі будучыя напрамкі ўзаемадзеяння і дарожную карту супрацоўніцтва.
«Калі коратка, мы дамовіліся аб тым, што трэба пачынаць супрацоўніцтва па-сур’ёзнаму. А для таго, каб пабудаваць добры будынак, патрэбны моцны фундамент. І прынялі рашэнне, што трэба пачынаць з трох добрых канкрэтных праектаў, якія ляжалі б у аснове нашага супрацоўніцтва», — адзначыў беларускі лідар.
Такі падыход адлюстроўвае галоўную задачу візіту Прэзідэнта Манголіі ў Мінск: перавесці ўзаемаразуменне на палітычным узроўні ў практычную плоскасць.
Дзверы адчынены
Афіцыйныя перагаворы кіраўнікоў дзяржаў адбыліся 26 кастрычніка ў Палацы Незалежнасці. Бакі абмеркавалі стан двухбаковых адносін, эканамічнае супрацоўніцтва, перспектывы прамысловай кааперацыі, развіццё гандлю і ўзаемадзеянне на міжнародных пляцоўках. 
«Вы павінны разумець, што для вас у нас усе дзверы адчынены. Калі ласка, глядзіце, рабіце вывады, бярыце на ўзбраенне. Мы будзем дапамагаць, садзейнічаць таму, каб вы выканалі ўсе намечаныя праграмы і выканалі абяцанні, якія вы давалі ў апошняй электаральнай кампаніі ў Манголіі», — сказаў Аляксандр Лукашэнка на перагаворах з Ухнаагійн Хурэлсухам у вузкім складзе. 
Больш падрабязна ўсе перспектыўныя напрамкі супрацоўніцтва былі разгледжаны на перагаворах у пашыраным складзе з удзелам урадавых дэлегацый. Беларусь і Манголія, у прыватнасці, абмеркавалі задачу па аднаўленні паставак беларускай машынабудаўнічай прадукцыі, стварэнне ў Манголіі сэрвісных цэнтраў і сумеснай вытворчасці, арганізацыю навучання кадраў. Беларусь таксама зацікаўлена ў кратным нарошчванні прысутнасці сваёй кар’ернай тэхнікі на горназдабыўных аб’ектах Манголіі, дзе яна традыцыйна была галоўным рабочым інструментам.
Развіваецца супрацоўніцтва паміж краінамі і ў сферы сельскай гаспадаркі. Напрыклад, у чэрвені ўрады дамовіліся аб новых пастаўках беларускай тэхнікі. У пілотнай партыі — трактары, бульба- і каменяўборачныя машыны, зернесушылкі.
Мінск прапануе Улан-Батару пабудаваць малочнатаварныя комплексы, каб пашырыць кааперацыю і ў племянной жывёлагадоўлі. Прадстаўнікі галіновых ведамстваў Беларусі і Манголіі падпісалі дагавор на прадастаўленне праектна-каштарыснай дакументацыі на ўзвядзенне МТК. Праект ужо атрымаў станоўчае заключэнне дзяржаўнай будаўнічай экспертызы ў Беларусі і цяпер будзе адаптаваны пад мясцовыя ўмовы і кліматычныя нормы Манголіі.
Як падзяліўся з журналістамі міністр прамысловасці Андрэй Кузняцоў, беларуская тэхніка ўжо гатова да адгрузкі. Размова ідзе ў тым ліку аб прадукцыі МТЗ і «Гомсельмаша». Абмяркоўваюцца пагадненні на пастаўку тэхнікі «АМКАДОР», «Пажснаб».
«Тэмпы росту супрацоўніцтва з Манголіяй у нас станоўчыя, амаль 110%, але гэтага недастаткова. Ставім задачу — не менш як 150%, і для гэтага ёсць перадумовы, — падкрэсліў Андрэй Кузняцоў. — Манголіі неабходна тое, што вырабляецца ў нас. Можна больш зрабіць упор на развіццё сельскай гаспадаркі ў Манголіі: павялічыць узаемавыгаднае супрацоўніцтва за кошт паставак тэхнікі з мэтай павелічэння прадукцыйнасці працы ў сельскай гаспадарцы. Гэта кормаўборачная тэхніка. Ёсць дамоўленасці аб продажы горназдабыўной, пасажырскай тэхнікі».
Да канца года Беларусь і Манголія плануюць падпісаць пагадненні аб стварэнні зборачных вытворчасцей, сэрвіснага і гарантыйнага абслугоўвання трактароў і іншай тэхнікі.
Новы цікавы напрамак — лёгкая прамысловасць. Прадпрыемствы дзвюх краін пачалі разам вырабляць тканіны з лёну і кашаміру. І гэта будзе ўжо не проста палатно, а сімвал жывога перапляцення дзвюх культур і эканомік, заявіў беларускі лідар. 
«Нам лёсам прадвызначана імкнуцца быць моцнымі самім і дапамагаць суседзям знаходзіць агульныя інтарэсы, асабліва ў крызісныя перыяды. Вам цяпер у гэтым плане прасцей: Кітай і Расія супрацоўнічаюць узорна. Нам складаней. Як ужо не раз бывала ў гісторыі Беларусі, мы апынуліся ў эпіцэнтры процістаяння Захаду і Усходу, — сказаў Аляксандр Лукашэнка на перагаворах у пашыраным складзе. — Таму мы з вамі выдатна разумеем адзін аднаго. Адсюль супадзенне поглядаў Беларусі і Манголіі на многія міжнародныя пытанні і праяўленую вамі ўвагу да нашай ініцыятывы па бяспецы ў Еўразіі».
/Будзе дапоўнена/.
