Лукашэнка заслухаў даклад памочніка па Магілёўскай вобласці Каткавец
Фота з архіва 23 верасня, Мінск . Кіраўнік дзяржавы Аляксандр Лукашэнка заслухаў даклад памочніка Прэзідэнта Беларусі — інспектара па Магілёўскай вобласці Надзеі Каткавец. Прэзідэнту даложана аб выкананні даручэнняў, дадзеных па выніках рабочай паездкі ў Шклоўскі раён 18 верасня, .
Першая тэма даклада датычылася ўдасканалення тэхналагічнай і арганізацыйнай кіруемасці буйных гаспадарак, умацавання дысцыпліны, устаранення існуючых недахопаў. Было дадзена даручэнне кіраўніку Адміністрацыі Прэзідэнта і памочніку ў Магілёўскай вобласці дэталёва разабрацца з арганізацыяй работы на месцах. На прыкладзе такіх гаспадарак рэгіёна, як «Гавяды-агра» і «Александрыйскае», гэта тэма актуальная і ў маштабах краіны ў цэлым.
Размова таксама ішла аб кадравым забеспячэнні, аптымізацыі затрат на ўсіх этапах і кантролі за вынікамі работы на месцах. Для дапамогі ў вырашэнні пастаўленых кіраўніком дзяржавы задач прыцягнуты таксама работнікі прамысловых прадпрыемстваў Магілёва.
Даложана аб прадаўжэнні ўборкі сельгаскультур і асенніх палявых работах у Магілёўскай вобласці. Цяпер у рэгіёне поўнасцю ўбраны збожжавыя і зернебабовыя культуры, а таксама рапс. Звыш плана пасеяны азімы рапс, у сувязі з чым Надзея Каткавец асабліва адзначыла эканамічную эфектыўнасць гэтай культуры. Азімыя збожжавыя на гэты момант пасеяны на 46% плошчаў. Прэзідэнту даложана, што аграрыі Магілёўскай вобласці забяспечаны ўсім неабходным, уключаючы мінеральныя ўгнаенні, каб завяршыць азімую сяўбу ў аптымальныя агратэхнічныя тэрміны. 
Яшчэ адна тэма даклада датычылася даручэнняў Прэзідэнта ў сферы бульбаводства: пашырэнне рынкаў збыту і нарошчванне аб’ёмаў вытворчасці. Надзея Каткавец запэўніла, што пад рэалізацыю гэтай задачы ёсць адпрацаваныя тэхналогіі вытворчасці і захоўвання, добрыя айчынныя сарты. Галоўнае цяпер — пошук дадатковых рынкаў збыту, чаму ў бліжэйшы час будзе ўдзелена пільная ўвага.
