Лукашэнка на Аршанскім ільнокамбінаце прыняў удзел у запуску новай лініі
13 лістапада, Мінск . У час наведвання Аршанскага льнокамбіната Прэзідэнт Беларусі Аляксандр Лукашэнка азнаёміўся з перспектывамі развіцця прадпрыемства і прыняў удзел у запуску новай вытворчай лініі,
Запушчана лінія па вытворчасці кальцавой пражы высокіх нумароў з укладаннем катанізаванага льновалакна. Рэалізацыя гэтага праекта дасць магчымасць арганізаваць выпуск новай прадукцыі.
Прэзідэнту далажылі аб развіцці Аршанскага льнокамбіната. Тут выйшлі на аб’ёмы экспарту ў памеры $100 млн, выканалі даручэнне па асваенні глыбокай перапрацоўкі кароткага льновалакна, шмат увагі ўдзяляюць якасці і ўжо некалькі гадоў працуюць толькі на ўласным ільняным валакне.
«Наша асноўная задача — каб сыравіна была якасная», — звярнуў увагу беларускі лідар.
Думаюць на Аршанскім ільнокамбінаце і над далейшай мадэрнізацыяй у бліжэйшыя гады. Размова, напрыклад, ідзе аб укараненні самай сучаснай тэхналогіі фарбавання.
Абсталяванне для камбіната ў асноўным закупляецца па імпарце. Аляксандр Лукашэнка нагадаў, што раней даручаў прамысловаму сектару навучыцца рабіць хаця б частку з гэтага. Кіраўнік дзяржавы актуалізаваў адпаведныя задачы, даручыўшы гендырэктару Алегу Буянаву падрыхтаваць пералік найбольш запатрабаваных вузлоў і агрэгатаў, якія можна было б імпартазамясціць.
Аляксандр Лукашэнка нагадаў, што ў свой час захаваць Аршанскі льнокамбінат было яго валявым рашэннем. «Для мяне гэта вельмі важнае прадпрыемства», — падкрэсліў ён.
Прэзідэнт паставіў задачу, каб да 2030 года перапрацоўвалася 100% кароткага льновалакна. Для рэалізацыі гэтага даручэння абмяркоўваецца магчымасць выдзялення прадпрыемству дадатковага крэдыту пад нарошчванне магутнасцей.
Цяпер разам з Беларуссю буйнымі вытворцамі лёну ў Еўропе з’яўляюцца Францыя і Бельгія. У Беларусі пры гэтым ёсць увесь ланцужок — ад вырошчвання на полі да вытворчасці высакаякаснай гатовай прадукцыі. «Пры такім падыходзе на Захадзе хутка адны мы застанёмся», — заўважыў беларускі лідар.
«Вы ведаеце мае падыходы. Нічога ламаць не трэба. Мы нешта маем — трэба ўдасканальваць. Нічога не развальваючы, не разбураючы», — сказаў Аляксандр Лукашэнка работнікам прадпрыемства ў час запуску новай лініі.
Ён таксама падкрэсліў, што той ці іншы праект трэба старацца рэалізоўваць у максімальна сціслыя тэрміны.
/Будзе дапоўнена/. 
