Арцёменка: да 2030 года 25% грамадзян старэйшых за 75 гадоў павінны быць ахоплены сацпаслугамі
Фота з архіва 29 верасня, Мінск . Да 2030 года 25% грамадзян старэйшых за 75 гадоў павінны быць ахоплены сацпаслугамі. Аб гэтым журналістам паведаміла намеснік міністра працы і сацыяльнай абароны Марына Арцёменка,
Паводле яе слоў, адной з галоўных задач праграмы «Грамадства роўных магчымасцей» з’яўляецца павышэнне ахопу сацыяльнымі паслугамі катэгорыі насельніцтва ва ўзросце 75 гадоў і больш. «Фактычна, да 2030 года 25% гэтай катэгорыі павінны быць ахоплены сацыяльнымі паслугамі. Улічваючы тэмпы дэмаграфічнага старэння, прагназуецца, што за гэты час колькасць атрымальнікаў сацыяльных паслуг узрасце фактычна на 50 тыс. Таму ў гэтых умовах плануецца таксама развіваць праграмы ўніверсітэтаў трэцяга ўзросту, школ актыўнага даўгалецця, фарміраваць прафесійную службу догляду праз навучанне персаналу, пашыраць праактыўныя і выяўляльныя фарматы работы праз інфарматызацыю сістэмы, аўтаматызацыю ўсіх працэсаў, якія сёння вядуць нашы цэнтры сацыяльнага абслугоўвання насельніцтва», — расказала намеснік міністра.
Марына Арцёменка таксама падкрэсліла, што сёння маштабуюць аказанне паслуг па доглядзе дома, каб пазбегнуць дачаснага змяшчэння грамадзян у сацыяльныя пансіянаты. Усяго сацыяльнымі паслугамі ва ўзросце 75 гадоў і больш ахоплена каля 180 тыс. грамадзян, дома атрымліваюць паслугі амаль 115 тыс. чалавек.
Развіваецца новая праграма працяглага догляду, калі сацыяльнае абслугоўванне аб’ядноўваецца з медыцынскай дапамогай дома. Такую дапамогу атрымалі ўжо каля 1 тыс. чалавек. «Важным з’яўляецца таксама сваяцкі догляд, у нас у краіне дзейнічаюць выплаты дапамогі па доглядзе чалавека з інваліднасцю першай групы або па доглядзе асобы, якая дасягнула васьмідзесяцігадовага ўзросту. Сёння 24 тыс. чалавек атрымліваюць такую дапамогу. Акрамя таго, сваякі, якія даглядаюць пажылога чалавека, маюць права навучацца ў цэнтрах сацыяльнага аблугоўвання насельніцтва навыкам догляду, а таксама атрымліваць псіхалагічную дапамогу», — расказала намеснік міністра.
Марына Арцёменка адзначыла, што ў Беларусі расце працягласць жыцця. Паводле яе слоў, у краіне сёння пражывае 45 тыс. грамадзян ва ўзросце 90 гадоў і старэйшых, колькасць людзей ва ўзросце 100 гадоў і больш складае 660 чалавек.
Намеснік міністра падкрэсліла, што фундаментам для стабільнага павышэння якасці жыцця пажылых грамадзян з’яўляецца пенсійнае забеспячэнне. «Задача дзяржавы сёння максімальна накіравана на тое, каб захоўваць рэальны рост пенсій. На пенсіі накіроўваецца каля 9% ВУП, у 2026 годзе гэта больш за 31 млрд рублёў. У бягучым годзе пенсіі павышаліся два разы, рост склаў 15%. Сёння сярэдні памер працоўнай пенсіі непрацуючага пенсіянера складае 1126 рублёў. Пры гэтым амаль кожны чацвёрты пенсіянер прадаўжае працаваць у эканоміцы краіны, гэта 489 тыс. чалавек ад агульнай колькасці пенсіянераў», — дадала яна.
Таксама Марына Арцёменка нагадала, што ў краіне ёсць механізмы, якія даюць магчымасць павялічыць пенсію. «Напрыклад, праграма «Адкладзеная пенсія», калі чалавек адкладае атрыманне пенсіі, прадаўжае працаваць і ў далейшым атрымлівае дадатковую прэмію. Такіх грамадзян, якія атрымліваюць дадатковую прэмію, у нас у краіне 5 тыс. Таксама дзейнічае і даволі новы механізм — гэта дадатковая накапляльная пенсія, народная назва праграмы «3+3″, якая сёння ахоплівае каля 95 тыс. грамадзян», — расказала яна.
Паводле слоў намесніка міністра, у заканадаўстве прадугледжаны і ахоўныя меры для грамадзян перадпенсійнага ўзросту. У прыватнасці, законам прадугледжана магчымасць працаўладкавання ў лік броні, прадугледжана таксама магчымасць павышэння кваліфікацыі і перападрыхтоўка за кошт сродкаў наймальніка. «Акрамя таго, для беспрацоўных грамадзян перадпенсійнага ўзросту прадастаўлена права атрымліваць дапамогу па беспрацоўі да шасці месяцаў, для іншых катэгорый грамадзян — да трох месяцаў. За восем месяцаў бягучага года садзейнічанне ў працаўладкаванні ў нас аказана каля 1,4 тыс. грамадзян перадпенсійнага ўзросту і 1,9 тыс. грамадзян пенсійнага ўзросту. У перыяд з 28 верасня па 2 кастрычніка ва ўсіх рэгіёнах арганізаваны 153 «сярэбраныя» кірмашы вакансій. За першы дзень кірмашоў па ўсёй краіне іх наведалі ўжо каля 500 чалавек», — адзначыла Марына Арцёменка.
Паводле яе слоў, адна з асноўных задач нацыянальнай стратэгіі «Актыўнае даўгалецце» — максімальна захоўваць сацыяльную ўключанасць актыўных пажылых грамадзян. «Адным з самых даступных спосабаў уключэння з’яўляецца валанцёрства. Практычна кожны пяты сярод усіх валанцёраў — гэта асобы, старэйшыя за 65 гадоў. Толькі на базе нашых цэнтраў сацыяльнага абслугоўвання насельніцтва 6 тыс. актыўных пажылых грамадзян уваходзяць у валанцёрскія атрады сярэбранага ўзросту. Таксама на базе тэрытарыяльных цэнтраў абслугоўвання насельніцтва дзейнічае каля 2 тыс. гурткоў і клубаў, яны ахопліваюць каля 28 тыс. пажылых грамадзян», — дадала Марына Арцёменка.
Намеснік міністра нагадала, што таксама ў краіне дзейнічае праект «Тэрыторыя комплекснага клопату». «У цэнтры яго не толькі пытанні забеспячэння бяспечнай жыццядзейнасці грамадзян пажылога ўзросту, але і добраўпарадкаванне тэрыторыі», — расказала яна.
