Краінам ЕАЭС трэба актыўней дзейнічаць для фарміравання агульнага фінансавага рынку — Нацбанк
29 кастрычніка, Нясвіж . Краінам ЕАЭС трэба актыўней дзейнічаць для фарміравання агульнага фінансавага рынку. Аб гэтым заявіў старшыня праўлення Нацыянальнага банка Раман Галоўчанка ў час пасяджэння Кансультацыйнага савета па валютнай палітыцы цэнтральных (нацыянальных) банкаў дзяржаў — членаў ЕАЭС, 
«Нам неабходна больш актыўна дзейнічаць у рамках фарміравання агульнага фінансавага рынку нашага саюза. Тут ужо зроблены пэўныя крокі. Распрацаваны праект пагаднення аб стандартызаванай ліцэнзіі ў банкаўскім і страхавым сектарах і ажыццяўляюцца ўнутрыдзяржаўныя працэдуры для яго падпісання. Падрыхтавана прававая аснова для ўзаемнага допуску прафудзельнікаў рынку каштоўных папер да арганізаваных таргоў на біржах краін ЕАЭС. У жніўні гэтага года прыняты адпаведны міжнародны дагавор», — сказаў Раман Галоўчанка.
Ён спыніўся і на асобных аспектах рэгулявання фінансавай сферы. «Тут ёсць шэраг супярэчнасцей, якія патрабуюць узгодненых рашэнняў. Сярод іх можна вылучыць развіццё лічбавых фінансавых актываў, рэгуляванне якіх адбываецца ў нашых краінах па розных правілах. Адсутнасць узгодненых падыходаў да класіфікацыі лічбавых актываў, патрабаванні да эмітэнтаў і трансгранічнага абарачэння ствараюць рызыкі рэгулятарнага арбітражу і абмяжоўваюць патэнцыял рынку. Гэтыя пытанні маюць сістэмны характар і, вядома ж, не могуць быць вырашаны намаганнямі аднаго толькі цэнтральнага банка», — адзначыў старшыня праўлення Нацбанка.
«Мы гатовы да выпрацоўкі ўзгодненых рашэнняў, якія зробяць фінансавую сістэму ЕАЭС больш устойлівай, зручнай для грамадзян і бізнесу. Упэўнены, што сённяшняя дыскусія перарасце ў рэальныя справы для ўмацавання стабільнасці і эканамічнага росквіту нашых краін», — рэзюмаваў Раман Галоўчанка.
На парадку дня пасяджэння — пытанні аб бягучай эканамічнай сітуацыі і ходзе рэалізацыі грашова-крэдытнай палітыкі ў дзяржавах — членах Еўразійскага эканамічнага саюза, аб абмене вопытам у частцы процідзеяння несанкцыянаваным плацежным аперацыям. Таксама разглядаецца вопыт выкарыстання і перспектывы ўкаранення лічбавых валют цэнтральных (нацыянальных) банкаў краін ЕАЭС, абмяркоўваецца рэгуляванне віртуальных актываў у дзяржавах саюза.
Фота Сяргея Шэлега
