Дзяржстандарт: Камітэт па стандартызацыі і якасці СД будзе «адным акном» для вырашэння пытанняў бізнесу
Фота з архіва 4 чэрвеня, Мінск . Камітэт па стандартызацыі і якасці Саюзнай дзяржавы будзе «адным акном» для вырашэння пытанняў бізнесу. Аб гэтым заявіла старшыня Дзяржстандарту Алена Маргунова на Пецярбургскім міжнародным эканамічным форуме, выступаючы на панэльнай дыскусіі «Саюзная дзяржава: час быць першымі»,
«У лютым бягучага года кіраўнікі дзяржаў прынялі рашэнне аб стварэнні наднацыянальнага Камітэта па стандартызацыі і якасці Саюзнай дзяржавы. Такое рашэнне накіравана на пабудову механізма саюзнай каардынацыі, каб спыніць увоз неадпаведнай прадукцыі, прадухіліць з’яўленне штучных бар’ераў ва ўзаемным гандлі і гандлі з трэцімі краінамі, павысіць ахову рынку ад небяспечнай, няякаснай, неадпаведнай прадукцыі, абарону правоў спажыўцоў і айчынных вытворцаў тавараў. Упаўнаважанымі дзяржаўнымі органамі, якія забяспечваюць дзейнасць гэтага камітэта, вызначаны Дзяржстандарт Беларусі і Расстандарт», — сказала Алена Маргунова.
З беларускага боку ў камітэт увайшлі прадстаўнікі Дзяржстандарту і падведамных арганізацый, расійскага — Міністэрства прамысловасці і гандлю, Расстандарту, Расакрэдытацыі і Расійскага інстытута стандартызацыі. Таксама ў рабоце камітэта будуць прымаць удзел прадстаўнікі Пастаяннага камітэта Саюзнай дзяржавы. «Такім чынам, мы збіраем за адным сталом усіх ключавых ігракоў, ад якіх залежыць і лёс стварэння тавару, і яго абарачэнне на саюзнай тэрыторыі. Прадстаўлены тыя, хто піша стандарты, тыя, хто адказвае за дакладнасць вымярэнняў, і тыя, хто пацвярджае законнасць выдачы сертыфікатаў. Удзел Мінпрамгандлю Расіі і Дзяржстандарту Беларусі азначае, што рашэнне камітэта — гэта не проста парады, гэта пазіцыя профільных ведамстваў. Прысутнасць Пастаяннага камітэта Саюзнай дзяржавы гарантуе, што гэта работа не будзе ісці насуперак агульным курсам інтэграцыі. І такое прадстаўніцтва ператварае камітэт у «адно акно», у выніку чаго бізнесу не трэба бегаць па розных інстанцыях, па розных ведамствах у дзвюх краінах. Яны могуць на пляцоўцы камітэта вырашаць усе рабочыя, экспертныя пытанні», — адзначыла старшыня Дзяржстандарту.
Для дэталёвай прапрацоўкі задач і пытанняў у складзе камітэта могуць стварацца рабочыя групы па напрамках, прыцягвацца запрошаныя эксперты, прадстаўнікі зацікаўленых ведамстваў. «Наяўнасць такіх механізмаў робіць камітэт жывым, гнуткім інструментам для вырашэння праблем бізнесу. Мы гатовы слухаць практыкаў, каб нашы агульныя правілы працавалі на развіццё вытворчасці, не ствараючы ніякіх штучных перашкод», — падкрэсліла Алена Маргунова.
Адной з ключавых задач застаецца стандартызацыя на ўзроўні Саюзнай дзяржавы. «На сённяшні дзень падпісана і ўжо рэалізуецца пяць планаў стандартызацыі СД. У першую чаргу гэта сфера дзіцячага харчавання, вобласць энергазберажэння і павышэння энергетычнай эфектыўнасці, грузавых аўтамабіляў, электробусаў, станкабудавання. Гэтыя планы змяшчаюць пералік неабходных стандартаў па найбольш адчувальных для прамысловасці пытаннях. Так стандарты дадуць магчымасць нівеліраваць бар’еры, якія могуць узнікнуць на першым этапе па вызначэнні патрабаванняў да прадукцыі», — абазначыла старшыня Дзяржстандарту.
Акрамя распрацоўкі стандартаў і каардынацыі работ, камітэт прызначаны садзейнічаць гарманізацыі і ўстараненню перашкод у гандлі як на тэрыторыі Саюзнай дзяржавы, так і на знешніх рынках, а таксама аказваць любую метадалагічную, кансультацыйную дапамогу вытворцам у выхадзе на рынкі трэціх краін, садзейнічаць павышэнню якасці прадукцыі на саюзнай тэрыторыі.
«Стварэнне Камітэта па стандартызацыі і якасці Саюзнай дзяржавы — гэта фундамент даверу паміж дзяржавай і бізнесам, аб’яднанне рэгулятараў Беларусі і Расіі для адстойвання агульнага саюзнага рынку», — сказала на заканчэнне Алена Маргунова.
