«Дасягненні ўражваюць, але нам ёсць куды рухацца». Турчын пра форум «ІНАПРАМ» у Екацярынбургу
Фота з Telegram-канала Урада Беларусі 5 ліпеня, Мінск . Прэм’ер-міністр Аляксандр Турчын прыбыў у Екацярынбург з рабочым візітам. Ён прымае ўдзел у міжнароднай прамысловай выстаўцы «ІНАПРАМ», паведамілі ў прэс-службе ўрада.
Візіт пачаўся з сустрэчы са старшынёй урада Расійскай Федэрацыі Міхаілам Мішусціным. Асноўная тэма сёння — паглыбленне эканамічнай інтэграцыі і іншыя пытанні, якія маюць узаемны інтарэс.
Аляксандр Турчын адзначыў, што парадак дня, які задаюць прэзідэнты Беларусі і Расіі, заўсёды інтэнсіўны. І сённяшняя сустрэча на палях «ІНАПРАМА» — лагічны працяг нядаўняй сустрэчы кіраўнікоў Беларусі і Расіі. Таму трэба прыняць шэраг рашэнняў.
Парадак дня вялікі, а таму ўдзельнікам сустрэчы ёсць што абмеркаваць. «Я ўпэўнены, што форум «ІНАПРАМ» — гэта вялікая справа не толькі для Расійскай Федэрацыі, але і для Беларусі, для нашых краін ЕАЭС, — падкрэсліў прэм’ер-міністр Беларусі. — Нашы новыя дасягненні, сумесныя праекты — усё ўражвае, але нам ёсць куды рухацца».
Міхаіл Мішусцін падкрэсліў, што яны сабралі каманду, каб у першую чаргу абмеркаваць пытанні двухбаковага парадку дня, якія перад удзельнікамі паставілі лідары дзвюх краін. І сярод іх — пытанні прамысловай кааперацыі.
«Беларуская прадукцыя ўражвае, вельмі шмат цікавых, інавацыйных рашэнняў, якія прапанавалі партнёры. Сумесныя прадпрыемствы разам з расіянамі будуць прадстаўлены на стэндах. Мы паглядзім лепшыя варыянты колавай тэхнікі, прамысловых вырабаў рознага характару, — адзначыў Міхаіл Мішусцін. — Таксама пагаворым аб пытаннях, звязаных з вуглевадародам, з узаемадзеяннем па блоку пытанняў у энергетыцы, фінансавай сферы. І, вядома, у сацыяльнай і культурнай сферах. А ўжо заўтра правядзём афіцыйныя перагаворы».
Таксама Аляксандр Турчын запрасіў Міхаіла Мішусціна на форум «ІНАПРАМ. Беларусь», які пройдзе ў Мінску з 30 верасня па 2 кастрычніка. 
