Белстат апублікаваў статыстычныя партрэты бацькі і маці да Тыдня бацькоўскай любові
Фота з архіва 9 кастрычніка, Мінск . Штогод з 14 па 21 кастрычніка ў Беларусі адзначаецца Тыдзень бацькоўскай любові, аб’ядноўваючы Дзень маці (14 кастрычніка) і Дзень бацькі (21 кастрычніка). Аб партрэтах сярэднестатыстычных бацькоў, расказалі БЕЛТА ў Нацыянальным статыстычным камітэце.
Маці часцей за ўсё мае беларускае грамадзянства, знаходзіцца ў шлюбе, пражывае ў горадзе, выхоўвае дваіх дзяцей, мае вышэйшую або сярэднюю спецыяльную адукацыю, працуе ў сферы гандлю або адукацыі.
У бацькі таксама часцей за ўсё беларускае грамадзянства, ён жанаты, гараджанін, выхоўвае дваіх дзяцей, мае вышэйшую або сярэднюю спецыяльную адукацыю, працуе ў апрацоўчай прамысловасці або ў будаўнічай сферы.
Паводле даных Нацыянальнага статыстычнага камітэта на 1 студзеня 2026 года, у Беларусі пражывалі 4045,1 тыс. жанчын ва ўзросце 18 гадоў і старэйшых (55,1% ад агульнай колькасці насельніцтва ва ўзросце 18 гадоў і старэйшых) і 3294,7 тыс. мужчын (44,9% ад агульнай колькасці насельніцтва ва ўзросце 18 гадоў і старэйшых). Пры гэтым на 1 тыс. жанчын ва ўзросце ад 18 да 39 гадоў прыпадае 1016 мужчын такой жа ўзроставай групы. На 1 тыс. жанчын ва ўзроставай групе ад 40 гадоў і старэйшых прыпадае 730 мужчын такой жа ўзроставай групы.
Колькасць жанчын у рэпрадуктыўным узросце (15-49 гадоў) на 1 студзеня 2026 года склала 2088,9 тыс. (42,8% ад агульнай колькасці жанчын), пры гэтым 84% з іх пражываюць у гарадской мясцовасці. Сярэдні ўзрост маці (паводле даных 2025 года) пры нараджэнні дзіцяці складае 30,5 года, пры нараджэнні першынца — 27,6 года. У 2025 годзе нарадзіліся першымі — 40% дзяцей, другімі — 34%, трэцімі і наступнымі — 26%. Сталі мамамі ў выніку прымянення метаду экстракарпаральнага апладнення 1610 жанчын.
У 2025 годзе было зарэгістравана крыху больш за 52 тыс. шлюбаў, пры гэтым 61,6% жанчын упершыню заключылі шлюб, іх сярэдні ўзрост склаў 26,7 года, 38,4% заключылі шлюб паўторна, іх сярэдні ўзрост склаў 40,5 года. Доля мужчын, якія заключылі шлюб упершыню, склала 65%, сярэдні ўзрост уступлення ў першы шлюб — 29 гадоў, 35% мужчын жаніліся ўпершыню, іх сярэдні ўзрост — 43,4 года.
Паводле даных перапісу насельніцтва 2019 года, у Беларусі налічвалася 2612413 сем’яў. З іх 43,7% мелі дзяцей малодшых за 18 гадоў. З гэтых 43,7% сем’яў 57,3% мелі адно дзіця, 33,5% — дваіх дзяцей, 9,2% — траіх і больш дзяцей.
