Асеннія канікулы ў Нацыянальным дзіцячым тэхнапарку. Стартаваў прыём заявак на адукацыйную змену
Фота Нацыянальнага дзіцячага тэхнапарка 18 верасня, Мінск . Пачаўся прыём заявак на адукацыйную змену «ТЭХНА ЭВА: Тэрыторыя адкрыццяў», якая пройдзе з 1 па 7 лістапада ў Нацыянальным дзіцячым тэхнапарку. Аб гэтым БЕЛТА паведамілі ва ўстанове адукацыі.
Насычаная адукацыйная праграма дае магчымасць дзіцяці паглыбіцца ў свет навукі, тэхналогій і творчасці, развіць навыкі і завесці новых сяброў. У яе ўключаны заняткі ў лепшых навуковых лабараторыях па вядучых напрамках, такіх як VR і AR, робататэхніка, інжынерная экалогія і энергетыка новага пакалення. «Дзеці змогуць азнаёміцца з кожным напрамкам і паспрабаваць свае сілы ў асваенні новых ведаў і навыкаў, а магчыма — нават вызначыцца з будучай прафесіяй. Кожны занятак пройдзе ў атмасферы натхнення і адкрыццяў, а вопытныя настаўнікі дапамогуць раскрыць патэнцыял кожнага ўдзельніка», — дадалі арганізатары.
Выхаваўчая праграма накіравана на развіццё лідарскіх якасцей і крэатыўнасці. У Нацыянальным дзіцячым тэхнапарку ўпэўнены, што адукацыя — гэта не толькі атрыманне ведаў, але і ўменне працаваць у камандзе, размаўляць і знаходзіць рашэнні. «Мы падрыхтавалі займальныя мерапрыемствы, уключаючы маштабны гульнявы праект, які дасць магчымасць юнакам і дзяўчатам паглыбіцца ў свет тэхналогій праз гульню. У праграму ўваходзяць і тэматычныя спікер-клубы з запрошанымі спецыялістамі з розных сфер навукі, культуры, спорту і эканомікі. Акрамя таго, запланаваны інтэлектуальныя квізы, прагляд і абмеркаванне навукова-папулярных і дакументальных фільмаў, а таксама турніры па кіберспорце», — расказалі ва ўстанове.
Кожнаму ўдзельніку будзе прапанаваны шырокі спектр майстар-класаў. Яны будуць праходзіць штодзённа і дапамогуць развіць таленты і творчыя здольнасці: стварэнне аб’ёмных мадэлей, работа з віртуальнымі асяроддзямі, распрацоўка ўнікальных работ і візуальных рашэнняў, а таксама практычнае знаёмства з магчымасцямі штучнага інтэлекту. Праграма таксама ўключае асваенне візуальных эфектаў, сучаснага прадакшна, работу з відэа, гукам, лічбавым кантэнтам і развіццё праектаў з выкарыстаннем digital-інструментаў.
«Адукацыйная змена «ТЭХНА ЭВА: Тэрыторыя адкрыццяў» у Нацыянальным дзіцячым тэхнапарку — гэта не толькі магчымасць азнаёміцца з вядучай адукацыйнай установай Беларусі, але і сапраўдная платформа для натхнення і перспектывы з бязмежнымі магчымасцямі і інавацыйнымі ідэямі», — падкрэслілі ў тэхнапарку.




