Беларускія акрабаты заваявалі 10 узнагарод міжнароднага турніру ў Адзінцове
Фота Беларускай асацыяцыі гімнастыкі 4 мая, Мінск . Беларусы заваявалі дзесяць медалёў на міжнародных спаборніцтвах па спартыўнай гімнастыцы «Кубак заслужанага трэнера СССР Уладзіміра Гургенідзэ», паведамілі БЕЛТА ў прэс-службе Беларускай асацыяцыі гімнастыкі.
Турнір прайшоў у падмаскоўным горадзе Адзінцова, у актыве беларускай каманды дзве залатыя, пяць сярэбраных і тры бронзавыя ўзнагароды. У заліку жаночых груп перамогу атрымалі Валерыя Капітулец, Вікторыя Капітулец і Вера Шпак. Другое месца ў пары ў дзяўчат занялі Ганна Каланіцкая і Валерыя Міхейчык, у гэтым жа відзе праграмы ў мужчын тройку лепшых замкнулі Ягор Емяльяненка і Раман Ласюк.
Сярод юніёраў да 20 гадоў золата ў міксце ўзялі нашы Ксенія Стэфанчык і Юрый Чарняўскі. Серабро выйграла тройка ў складзе Паліны Белянковай, Аляксандры Раптуновіч і Марыі Рысінай (U20). Таксама на другую прыступку п’едэстала падняліся Дар’я Бяспалікава і Іван Лысенкаў (U18, мікст), Глеб Гарбацкі і Арсеній Еўтуховіч (U18, пара), а таксама Платон Гурда і Мікіта Берлін (U20, пара).
Яшчэ два бронзавыя медалі былі здабыты ў спаборніцтвах дуэтаў у дзяўчат да 16 і да 18 гадоў. Трэція месцы ў сваіх узроставых групах занялі Лізавета Радзівонава з Васілісай Трус і Паліна Кукса з Кацярынай Федараковай.
